DILI, STLTIMORLESTE.com – Prezidente Republika (PR) Jose Ramos Horta liu husi Sosiedade Sivil neebe koordena ho IX Governu liu husi Primeiru Ministru (PM) Xanana Gusmão, fahe ksolok natal ba oan kiak sira iha Salele.
Delegasaun ida husi Prezidensia Republika iha koordenasaun ho IX Governu Konstitusional, vizita ona Centro Esperansa ba Feto iha Salele, iha Munísipiu Covalima, hodi entrega pakote asistensia esensial ba ajuda labarik sira neebe hela iha instituisaun refere.
Asesor Prezidensia Republika, Quintiliano Moniz liu husi nia aprezentasaun iha Salele, Kinta (17/12/2025) hatete, vizita nee parte inisiativa konjunta “Natal ba Povu”, programa responsabilidade sosial ida neebe lidera husi Prezidente Republika, Jose Ramos-Horta no husi Primeiru-Ministru, Kay Rala Xanana Gusmão, ho objetivu atu garante grupu vulneravel sira, inklui oan-kiak, ema moras, no prizioneiru sira la-haluha durante epoka natal nee.
Durante serimonia entrega, reprezentante husi Prezidensia Republika, Asesor Quintiliano Moniz sublina, distansia jeografika la-haketak povu husi sira-nia líder sira.
Hodi koalia ba labarik no ba ema sira neebe kuidadu labarik sira, delegasaun hatoo katak, maske doasaun material neebe apoia husi Ministeriu Komersiu no Industria no setor privadu nee signifikativu, mensajen prinsipal mak domin nuudar aman no solidariedade.
“Maske imi dook iha Salele, imi nafatin iha Prezidente Republika no Primeiru-Ministru nia fuan,” dehan asesor nee.
Reprezentante nee dehan, hodi destaka kompromisu lideransa nian atu tau matan ba sidadaun sira neebe vulneravel liu iha nasaun nee.
Responsavel husi Centro Esperansa espresa emosaun boot no gratidaun ba vizita nee, hodi deskreve Prezidente nia jestu hanesan aman ida neebe lakohi husik nia oan sira mesak.
Reprezentante husi uma-mahon nee nota katak, apoiu kontinua husi lideransa nasional garante labarik sira hetan roupa, hahan no kuidadu, hodi hametin sira-nia sentimentu pertença iha família Timoroan nia laran.
Vizita nee remata ho distribuisaun hahan, roupa, no prezente natal nian, hodi lori oin-midar no espíritu Natal nian ba labarik sira iha Salele.
Jornalista: Emerenciana Pinto
Editora: Domingas Gomes
