DILI, STLTIMORLESTE.com – Prezidente Repúblika (PR), Jose Ramos Horta presta omenajen ba jigante istoria Fidel Castro, iha aniversariu falecimentu ba dala 9.
Iha loron Kuarta (26/11/2025) Prezidente Republika, Jose Ramos-Horta partisipa serimonia solene ida iha Embaixada Kuba, hodi marka aniversariu ba da-9 husi falecimentu Komandante-Xefe Fidel Castro.
Iha intervensaun, Xefe Estadu reflete kona-ba ligasaun diplomatika klean entre nasaun rua nee, liu-liu hodi lembra fali sorumutu importante iha tinan 2003 ho Castro hamutuk ho Prezidente iha tempu neeba, Xanana Gusmão, iha Kuala Lumpur.
Prezidente Republika Ramos Horta liu husi diskursu sublina oinsa interasaun nee tau fundasaun ba Brigada Medika Kubana neebe sai transformadora iha Timor-Leste, neebe fasilita ona treinamentu ba mediku timoroan nain-700 resin no estabelesimentu eskola medika nasional ida.
Hodi fahe istoria pesoal sira husi nia vizita sira ba Havana, Prezidente deskreve Castro nuudar lider ida neebe kuriozu tebes no apaixonadu ho konesimentu luan kona-ba asuntu global, agrikultura no dezenvolvimentu.
Nia gaba Kuba nia solidariedade internasional inkrivel, hodi nota katak maski hasoru dezafiun ekonomiku rasik no nuudar nasaun kiik, nasaun nee atua ona nuudar superpotensia ba ajuda umanitaria.
Prezidente Republika sita Kuba nia apoiu desizivu iha Angola, nia programa alfabetizasaun adultu sira-nian, no nia asistensia medika durante funu Vietname nian nuudar ezemplu sira husi legadu servisu nian neebe la iha komparasaun ba mundu dezenvolvimentu.
Hodi konklui nia omenajen, Prezidente Republika Ramos-Horta karakteriza Fidel Castro nuudar “jigante istoria nian no jigante kobesimentu nian neebe moris hela komparavel ho figura ikonika sira hanesan Nelson Mandela no Sukarno.
Prezidente Republika sublina katak maski ema bele iha diverjensia ideolojika, Castro nia impaktu iha palku mundial no nia kompromisu ba umanidade ezije respeitu universal.
Jornalista: Emerenciana Pinto
Editora: Carme Ximenes
