DILI, STLTIMORLESTE.com – Prezidente Republika José Ramos Horta husu Prezidente Autoridade Munisipiu Dili (PAMD) no Sekretariu Estadu Assuntu Toponimia no Organizasaun Urbana (SEATOU) atu hapara asaun violentu hasoru vendedor sira.
Prezidente Republika José Ramos Horta kontra makaas asaun neebe halo husi SEATOU ba Vendedor aileba sira, husu atu atua tuir Lei no produs Dokumentu neebe Justifika sira nia asaun.
Prezidente Ramos Horta apela ba Administradór Munisípiu Dili, Gregorio Saldanha Mouris no Sekretariu Estadu, Germano Santa Brites Dias atu hapara asaun violentu hasoru vendedór ambulante sira iha Dili no atu respeita lei sira neebe governu halo ona atu regula sira nia asaun. Liu tan, Prezidente husu ona ba Munisípiu Dili atu entrega relatoriu hotu kona-ba akontesimentu iha Kampung Baru semana nee no ida neebe akontese iha inísiu fulan Setembru.
Prezidente Ramos-Horta realsa katak, Dekretu Lei kona-ba Ijiene no Orden Publiku la bandu ema atu labele faan sasan, hanesan ai-fuan no modo iha estrada ninin. Restrisaun uniku maka vendedor sira labele taka dalan ba karreta sira ka ema lao ain sira ka kria situasaun perigozu ida.
“Hau nunka haree vendedor ambulante taka dalan iha estrada publiku nia sorin atu nunee ema labele lao liu no sosa sasan sira neebe sira hakarak faan. Sei la lojiiku tebes ba sira atu halo ida nee tanba ida nee sei signifika katak sira sei laiha kliente ruma. Sempre iha espasu neebe husik hela hosi vendedor sira ba ema sira atu lao liu no sosa sira-nia sasan sira,” katak PR liu husi Komunikadu Neebe STL asesu Kinta kalan 24/10/2024.
PR Horta hatete, Dekretu Lei la fo kbiit ba ema ida, inklui Munisípiu Dili ka Sekretqriu Estadu ka sira nia pesoal atu ataka vendedor sira no estraga sira-nia sasan no propriedade. Ida nee permite deit autoridade Munisipal sira atu hahu prosesu administrativu hasoru sira no fo multa US$ 5 ba ema sira se sira kria perigu ka obstakulu ba karreta ka ema lao ain sira.
“Autoridade sira komporta hanesan bandidu sira iha dalan neebe laiha kontrolu iha momentu ida ne’e no sira presiza hetan kontrolu kedas hosi Governu. Oinsa ita halo finje katak ita maka estadu direitu nian, dudu ita-nia adezaun ba ASEAN no hamriik ba direitus umanus internasionalmente bainhira ita iha bandidu sira-nee halai haleu dalan sira iha Dili,” katak Horta.
Prezidente husu ba Administrador Munisípiu Dili no Sekretariu Estadu atu fo kedas ba nia kopia relatoriu no dokumentu hotu-hotu relasiona ho asaun sira hasoru vendedor ambulante sira iha Kampu Baru durante fulan rua ikus nee.
“Hau hakarak haree faktu sira neebe sira hanoin katak sira iha direitu legal atu foti asaun violentu no esesivu neebe sira halo, tanba tuir saida maka hau komprende, laiha buat ida atu apoia asaltu violentu sira-nee hasoru ita-nia povu. Dekretu Lei ezije katak Munisípiu tenke prepara relatoriu ida neebe deskreve alegadu aktu ilegal sira no identifika ema sira neebe sira argumenta komete ofensa,” katak Ramos.
Nia hatutan, sira tenke hakerek iha relatoriu sira nee artigu saida mak sira hatete katak hetan violasaun espesífikamente. PR hakarak haree relatoriu sira nee no hakarak iha nia meza bainhira fila iha Mai TL.
Prezidente repete fali ninia apelu publiku anterior sira ba Prokurador Jeral atu investiga Sekretariu Estadu no ninia funsionariu sira-nia asaun.
“Ha’u hasoru malu ho PGR iha fulan Setembru no husu nia atu atua ba insidente dahuluk. Tuir hau nia konesimentu laiha buat ida maka halo hodi hatan ba pedidu neebw Hau sei bainhira hau fila-fali hakerek ba PGR no husu nia atu loke kazu ida ba insidente rua nee.” dehan Xefe Estadu.
Xefe Estadu hatete, povu sofre naton ona atu buka moris loroloron. Sira la merese atu hetan baku hosi bandidu sira tanba koko atu halo ida-nee. Nuudar Nia sai husi Dili iha fulan kotuk Amu Papa husu PR pesoalmente atu tau matan ba povu furak ida ne. “Hau iha intensaun atu halo ida nee,” hakotu nia.
(eme)
