MALIANA, STLTIMORLESTE.com – Prezidente Republika (PR), Jose Ramos Horta vizita labarik sira iha Dormitoriu Feminina Uma Esperansa neebe tau matan husi madre sira husi Kongregasaun Servas do Espírito Santo (SSpS).
Iha loron Tersa (13/01/2026) Prezidente Republika Jose Ramos Horta vizita ba Dormitoriu Feminina Uma Esperansa, iha Aldeia Oplegor, Suku Holsa, Postu Administrativu Maliana, neebe tau matan husi madre relijioza Kongregasaun Servas do Espírito Santo (SSpS).
Orfanatu Uma Esperansa agora simu labarik hamutuk nain-11, maioria mai husi família kbiit natoon no enfrenta problema sosial hanesan inan-aman divorsiu, trauma no inan aman destinu.
Iha Dormitoriu Feminina Uma Esperansa Madre SSpS sira fo formasaun edukativa hodi oferese mos kursu Postura (Suku-hena), akompanamentu moral no formasaun ba labarik sira. Tuir planu ba tinan 2026 nee, sira sei loke tan kursu lian Português no lian Inglês.
Iha vizita nee Madre sira aprezenta mos pedidu ba Prezidente Republika, liu-liu sira presiza tan material hanesan meja, kadeira no komputador, hodi apoia prosesu aprendizajen. Apoia ba hahan alimentar no nesesidade bazika, durante nee hetan tulun husi Prezidensia Republika, liu husi Unidade Servisu Sosiedade Sivil no Assuntu Sosial no mos apoiu direta husi Primeiru-Ministru, Kay Rala Xanana Gusmao.
Prezidente Ramos Horta hatete, Prezidensia kontinua buka apoiu oin-oin tuir nia kapasidade neebe iha, inklui kontribuisaun husi Prezidente nia amigo sira husi rede internasional iha Hong Kong, Japao no Australia, neebe durante nee fo ajuda hanesan laptop, PC, vitamina no roupa ba labarik no komunidade vulneravel sira iha teritoriu nasional.
Prezidente Republika mos hatoo agradese ba empresa lokal timoroan Bandido Qualidade “Gamboa” ba kontribuisaun material eskolar, pasta no kadernu ba labarik sira, inklui jaket udan ba komunidade sira.
Iha nia mensajen, Prezidente sublina katak ajuda urjente nee importante tebes atu responde imediata ba komunidade sira nia prekupasaun.
“Ajuda sira nee ita bele hateten laos solusaun, nee hanesan ba solusaun urjensian nian deit. Tanba ema neebe kiak, terus, labele hein fali too tinan ida, rua ka tolu, hodi hein fali situasaun sai diak lai, nee lae, Ema neebe presija ohin tenke ajuda ohin kedas,” dehan Prezidente Ramos Horta.
Tuir nia solusaun sustentavel, presiza foku ba dezenvolvimentu longu prazu nian, liuliu iha setor edukasaun, saude, empregu no kombate mal-nutrisaun iha Timor-Leste. Prezidente mos hatoo nia konfiansa katak Timor-Leste sei hetan dalan diak iha futuru.
(eme)
