DILI, STLTIMORLESTE.com – Prezidente Republika (PR) Jose Ramos Horta hatete, nia sei haree didiak Orsamentu Jeral Estadu (OJE) 2025 neebe haruka husi Parlamentu Nasional mai, nunee karik veta laos tanba sosa karreta ba deputadu sira iha Parlamentu Nasional.
Prezidente Republika Jose Ramos Horta hatoo kestaun nee ba jornalista sira bainhira remata vizita privadu ba iha Australia fila hikas mai Timor Leste iha Aeroportu Internasional Nicolao Lobato Komoro, Sabadu (12/10/2024).
Prezidente Republika hatete, nia sei haree lai OJE 2025, se buat ruma atu veta, laos tanba sosa karreta ka la sosa karreta.
“Hau sei haree lai OJE 2025, se buat ruma atu veta, laos tanba sosa karreta ka la sosa karreta, se atu veta karik buat ruma tanba hau bele haree katak orsamentu ba kosok oan sira, ba inan isin rua, luta ba kontra sub-nutrisaun, ba setor saude la sufisiente,” dehan PR Horta.
Prezidente Republika hatutan, sosa karreta nee laos hanesan halo parte buat ida neebe importante, buat nee bele simboliku diak loos, laos deit deputadu sira, governu tomak hatete la sosa karreta foun ba orgaun instituisaun sira estadu, hotu-hotu. Agora hanesan deit ba deputadu sira deit mak labele sosa karreta ba sira, maibe ba ministeriu sira bele sosa.
Xefe Estadu hatutan, se deputadu sira laiha transporte tenke iha sistema ruma atu fasilita sira nia servisu nuudar fiskalizador ba nasaun.
“Maibe hau sei haree atu veta OJE 2025, dala ruma bele iha responsabilidade, tanba governu, estadu presiza orsamentu, mezmu hau veta OJE 2025 sira Parlamentu Nasional maioria konfirma orsamentu sira, fila mak tenke promulga, entaun lakon tempu. Tuir konstituisaun hau bele veta, fila ba Parlamentu Nasional, sira nein muda virgula oan ida, haruka fila fali hau iha prazu fulan ida atu promulga,” katak Horta.
PR Horta haktuir tan katak, se atu veta nee klaru simbolu polítiku mas tenke iha razaun, laos tanba karreta ruma ba deputadu sira.
“Hau hanoin deputadu iha direitu ba karreta, tanba kau konhese kondisaun transporte sira nian nee, se laiha kondisaun sira iha mobilidade ba mai buat sira nee, laiha sistema seluk,” afirma PR Horta.
PR Horta fo ezemplu, iha Australia, Amerika oin seluk, deputadu sira laiha karreta, karreta lubuk ida pertense ba Parlamentu nian, kada deputadu presiza nia halo deit kompanhia ida sira neebe halo jestaun karreta nee minutu 5 deit karreta iha neeba ona.
Relasiona ho sosa kareta ba deputadu no depuatada sira, antes nee Movimentu Universitáriu Timor-Leste (MUTL) husu ba Prezidente Republika (PR) José Ramos Horta atu kansela sosa karreta ba deputadu/a sira iha Parlamentu Nasional (PN).
Aleinde nee, husu ba deputadu sira iha Parlamentu Nasional atu anula ka kansela fila-fali proposta lei Nu. 4 viaturas e transportes dos deputadus ka sosa kareta foun ba deputadu sira neebe mak sira vota maioria absoluta tiha ona iha loron 18 Setembru 2024 por konsiensia.
(eme)
