DILI, STLTIMORLESTE.com – Prezidente Republika (PR), Jose Ramos Horta sei kondekora ba Veteranus nain 4.400 iha loron 26 Novembru 2024.
Lia hirak nee hatoo husi Prezidente Administrasaun Conselho dos Combatentes da Libertação Nacional (CCLN), Vidal de Jesus Riak Leman ba jornalista sira iha Palasiu Prezidensial Bairo Pite, Kinta (14/11/2024).
Prezidente CCLN hatete, ohin mai hasoru malu ho Prezidente Republika, koalia kona-ba preparasaun ba kondekorasaun ba Veteranus sira neebe mak sei halo iha dia 26 Novembru.
“Assuntu prinsipal atu fo Kondekorasaun ba Veteranus sira anivel Nasional total 4.400 no balun fahe medalha nee iha Ordem 3, Ordem ida mak funu nain, Ordem Gerilha, Ordem Nicolao Lobato, ida nee sei fahe ba sira,” katak nia.
Nia hatete, serimonia kondekorasaun ba veteranus mai husi Munisipiu sira nomos anivel nasional no hahu iha 26 Novembru 2024.
“Ami sei hahu iha 26 Novembru, tanba Veteranus sira iha munispiu balun nee barak liu, tanba nee komesa kedas iha dia 26 Novembru nee ba anivel nasional,” katak nia.
Nia hatete, Veteranus neebe rejistu iha 2009 seidauk simu, tanba seidauk aprova no seidauk tama iha edital neebe bele dehan katak sei ilegal hela, maibe kuandu hatama edital no lori lista ba taka nee mak foin legal.
“2009 seidauk aprova no seidauk hatama iha edital, neebe ita bele dehan katak sei ilegal hela, kuandu hatama edital lori lista ba taka nee mak foin legal,” katak nia.
Bainhira hatoo lista hirak nee, Prezidente Republika Jose Ramos Horta hatete, nia disponivel atu bele fo kondekorasaun, no Prezidente Republika rasik aseita no orientasaun husi PR katak, fo kondekorasaun iha 26 Novembru, nunee bele hakmaan iha 28 Novembru.
Tipu kondekorasaun ba Veteranus iha oin tolu mak hanesan Ordem ida mak funu nain, Ordem Gerilha, Ordem Nicolao Lobato, nee rejistu iha tinan 2003.
(eme)
