DILI, STLTIMORLESTE.com – Prezidente Republika (PR), José Ramos Horta sei partisipa forum Ekonomiku Mundial 2025, husi loron 20-24 Janeiru 2025.
Ohin loron (18/01/2025) Prezidente Republika José Ramos Horta hahu vizita servisu ba Davos Suisa, hodi partisipa iha Enkontru Anual Fórum Ekonómiku Mundiál (WEF), husi loron 20-24 Janeiru 2025.
Enkontru Anual Fórum Ekonomiku Mundial (WEF) nian iha tinan ida nee ho tema “Kolaborasaun ba Era Intelijente” halibur líder global sira hodi diskuti dezafiu prinsipal global no rejional sira. Marka prezensa tuir konvite no nuudar konvidadu espesial husi Profesor Klaus Schwab, fundador no prezidente ezekutivu WEF nian.
“Ida nee hanesan tema ida neebe signifikativu ba Timor Leste, haree ba ita nia populasaun joven neebe sei hakuak no adapta ba teknolojia neebe mudansa ba beibeik inklui mosu Intelijensia Artifisial.” dehan Prezidente Republika.
Prezidente dehan, Forum nee mos foka ba impaktu jeopolítiku, estimula kresimentu hodi hadia padraun moris nian no jere tranzisaun enerjetika ida neebe justu no inkluzivu.
Durante ninia vizita, Prezidente Ramos Horta sei partisipa iha sesaun altu nivel balu neebe foka liu ba kooperasaun rejional, pas no dezenvolvimentu sustentavel.
Pontu altu mak ninia partisipasaun iha sesaun ASEAN nia viajen ba Unidade Lisaun sira iha Diplomasia no Kolaborasaun Rejional neebe foka ba oinsa ASEAN nia abordajen uniku ba diplomasia no kooperasaun multilateral haburas unidade iha diversidade nia laran, no mos hamosu dezenvolvimentu sustentavel, kresimentu inkluzivu iha hanoin polarizasaun neebe aumenta ba beibeik no tensaun sira entre superpotensia sira. Iha sesaun ida nee Prezidente sei hatoo intervensaun kona-ba papel ASEAN nian iha mundu, hamutuk ho distintu orador no partisipante sira seluk.
Prezidente sei kontribui mos ninia hanoin sira iha sesaun “Navegasaun iha Azia nia Hotspot sira”, hodi aborda dinamika seguransa rejional no implikasaun ekonomika sira iha rejiaun Ázia-Pasífiku. Sesaun publiku ida nee sei transmite direta, ho diskusaun sira kona-ba evita eskalasaun iha mudansa balansu poder no kompleksidade teritorial sira.
Nuudar Laureadu Premiu Nobel ba Pas, Prezidente Ramos Horta sei fahe nia esperiensia iha jantar espesial ida ho maluk Laureadu Nobel sira, inklui Profesor Ardem Patapoutian no Muhammad Yunus, ho prezensa husi Suas Majestade Liurai Philippe no Liurai Feto Mathilde husi Béljika, no Liurai Letsie III husi Lesoto.
Prezidente mos sei partisipa iha almosu enkontru unformal Líder Ekonomiku Mundial sira (IGWEL), neebe foka liu ba prevene kooperasaun non global hodi sai hanesan status quo foun.
Durante estadia iha Davos, Prezidente Ramos Horta tuir planu sei halao enkontru bilateral ho figura prinsipal internasional sira, inklui Sekretariu Jeral ASEAN nian, Kao Kim Hourn, hodi koalia kona-ba Timor Leste nia dalan ba adezaun tomak ba ASEAN.
Prezidente nia partisipasaun iha Forum Ekonomiku Mundial sublina kompromisu Timor Leste nian ba dialogu internasional no kooperasaun hodi hatan ba dezafiu global sira no avansa integrasaun rejional.
(eme)
