DILI, STLTIMORLESTE.com – Prezidente Republika (PR), Jose Ramos Horta simu delegasaun Konselheiru Komunidade Português husi Azia no Oseania.
Prezidente Republika, Jose Ramos Horta simu delegasaun konselheiru reprezenta komunidade português sira iha Azia no Oseania iha Palasiu Prezidensial Nicolau Lobato.
Enkontru nee konhesidu ho reuniaun Konselhu Rejional dahuluk husi Komunidade Portuguesa sira husi Azia no Oseania neebe halao iha Díli, iha loron 20 too 21 fulan Marsu, hodi marka ba dahuluk mak Timor Leste sai uma nain ba enkontru hanesan nee dezde hetan reprezentasaun iha konselhu iha tinan 2023.
Bainhira remata halo enkontru, Konselheiru Komunidade Portuguesa em Timor Leste, Filipe Silva ba jornalista sira iha Palasiu Prezidensial Nicolao Lobato, Kinta (20/03/2023) hatete, haksolok tebes mai hasoru malu ho Prezidente Republika, Jose Ramos Horta.
Nia dehan, delegasaun nee inklui reprezentante sira husi Timor Leste, Australia, Makau no Xina, neebe espresa sira nia kompromisu atu hametin ligasaun kultural no linguístika iha rejiaun tomak.
Konselheiru sira destaka relasaun istoriku sira entre Portugal, Timor Leste, Macau no Australia, hodi sublina sira nia hakarak atu kolabora iha inisiativa sira neebe promove lian no kultura português iha Azia no Oseania tomak.
Durante enkontru, Konselheiru sira propoin projetu kolaborativu oin-oin inklui interkambiu edukativu sira neebe sei permite estudante Timoroan sira hodi estuda lian português iha universidade sira iha Macau. Sira husu Prezidente nia apoiu hodi fasilita atividade kultural sira no haburas kooperasaun entre komunidade português sira iha nasaun oin-oin iha rejiaun.
Prezidente Ramos Horta simu sira nia inisiativa no enkoraja konselheiru sira atu dezenvolve atividade sira neebe promove interkambiu kultural no destaka relasaun istorika sira entre Portugal no Timor Leste. Prezidente dezafia delegasaun hodi kria projetu sira neebe sei hametin prezensa kultural portuguesa iha rejiaun, reforsa knaar Timor Leste nian hanesan reprezentante husi Comunidade dos Países de Língua Portuguesa (CPLP) iha Azia.
(eme)
