DILI, STLTIMORLESTE.com – Ohin (Kuarta-red) Prezidente Republika (PR), José Ramos Horta simu Karta Kredensia husi Embaixador sira neebe reprezenta nasaun sanulu-resin-rua (12), iha serimonia ofisial neebe halao iha Palasiu Prezidensia, Nicolau Lobato, Dili.
Serimonia nee marka inísiu formal ba misaun diplomatika Embaixador sira nian ba Timor Leste no sublina relasaun internasional nasaun nian neebe buras daudaun.
Embaixador sira neebe mak aprezenta sira nia kredensial Armin Limo, Embaixador Estraordinariu no Plenipotensiariu husi Bósnia-Herzegóvina, rezidente iha Jakarta, Indonezia, Maynor Jacobo Cuyún Salguero, Embaixador Estraordinariu no Plenipotensiariu husi Republika Guatemala, rezidente iha Jakarta, Indonezia, Jessica Maria Lópes Piña, Embaixadora Estraordinariu no Plenipotensiariu husi Republika Venezuela, rezidente iha Singapura, Prof. Dr. Talip Küçükcan, Embaixador Estraordinariu no Plenipotensiariu husi Republika Turkia, rezidente iha Jakarta, Indonezia, Sergei Gennadievich, Embaixador Estraordinariu no Plenipotensiariu husi Federasaun Rúsia, rezidente iha Jakarta, Indonezia, Marc Gerritsen, Embaixador Estraordinariu no Plenipotensiariu husi Reinu Olanda nian, rezidente iha Jakarta, Indonezia, Tomas Ferko, Embaixador Estraordinariu no Plenipotensiariu husi Republika Eslováka, rezidente iha Jakarta, Indonezia, Roberto Colamine, Embaixador Estraordinariu no Plenipotensiariu husi Republika Itália, rezidente iha Jakarta, Indonezia, Eliyahu Vered Hazan, Embaixador Estraordinariu no Plenipotensiariu husi Estadu Israel, rezidente iha Singapura, Tanya Dimitrova, Embaixadora Estraordinariu no Plenipotensiariu husi Republika Bulgária, rezidente iha Jakarta, Indonezia, Herman Pule, Embaixador Estraordinariu no Plenipotensiariu husi Republika Namíbia, rezidente iha Kuala Lumpur, Malázia, Dianela Joselina Pi Cedras, Embaixadora Estraordinariu no Plenipotensiariu husi Republika Orientál Uruguai, rezidente iha Canberra, Austrália.
Nunee mos Prezidente Ramos Horta hatoo benvindu ba Embaixador sira neebe foin akreditadu mai Timor Leste no espresa ninia kompromisu atu hametin relasaun bilateral ho sira nia nasaun idak-idak.
Iha biban nee Prezidente Republika hatete, serimonia ohin pasu importante ida iha viajen diplomatika Timor Leste, ho espansaun ba parseria diplomatika iha iha kontinente tomak no kria oportunidade foun ba koperasaun.
“Serimonia ohin nian reprezenta pasu importante ida iha viajen diplomatika Timor Leste nian, ho espansaun ba parseria diplomatika iha kontinente tomak, ami kria oportunidade foun ba kooperasaun. Nuudar demokrasia foinsae ida, ami valoriza relasaun internasional sira nee neebe ajuda hametin ami-nia pozisaun iha komunidade global enkuantu avansa ami nia kompromisu komun ba pas no prosperidade,” dehan PR, Horta.
Prezidente Republika sublina, importansia kooperasaun internasional hodi responde ba dezafiu global sira no avansa objetivu komun ba pas, seguransa, no dezenvolvimentu sustentavel.
Embaixador sira hatoo saudasaun no dezeju diak husi sira-nia Xefe Estadu no afirma sira-nia dedikasaun atu haforte ligasaun diplomatika ho Timor Leste.
Serimonia kredensial ida nee reflete Timor Leste nia esforsu sira neebe kontinua atu habelar nia ain-fatin diplomatiku no envolve ho komunidade internasional iha rejiaun oioin.
(eme)
