DILI, STLTIMORLESTE.com – Prezidente Republika (PR), Jose Ramos Horta simu karta kredensial husi Embaixador Portugal iha Timor Leste, Duarte Bue Alves.
Bainhira remata entrega karta kredensial, Ministru Negosiu Estranjeiru no Kooperasaun (MNEK), Bendito Freitas ba Jornalista sira, iha Palasiu Prezidensial, Nicolau Lobato, Bairo Pite, Segunda (22/09/2025) hatete, ohin Prezidente Republika simu karta kredensial husi Embaixador Portugal mai Timor Leste.
“Ohin Prezidente Republika simu karta kredensial husi Embaixador Republika Portuguesa mai Timor Leste, Embaixador Duarte Alves neebe sei asume funsaun nuudar Embaixador hodi troka Embaixadora uluk neebe uluk serbisu ho Timor Leste, doutora Manuela Bairos neebe fila ona,” dehan Ministru MNEK, Bendito.
Tiimor Leste ho Portugal tuir nia iha relasaun neebe nakonu ho istoria entre Nasaun rua, desde uluk too mai agora kontinua hametin relasaun bilateral ba oin nafatin.
“Ida nee hatudu nafatin katak relasaun neebe ke istoriko espesial tebes entre Timor Leste ho Portugal, nunee reprezentasaun entre diplomatika kontinua forte kontinua dimanimka atu nunee asuntu sira neebe ligado ba koperasaun Timor ho Portugal nee kontinua lao hanesan babain atu kumpre nafatin ita nia kooperasaun nee diak ba oin,” dehan nia.
Governante nee afirma,Timor Leste ho Portugal sei kontinua hametin relasaun bilateral iha area koperasaun nunee bele hametin lasu amizade rai rua ba futuru nafatin.
Jornalista: Emerenciana Pinto
Editora: Carme Cimenes
