DILI, STLTIMORLESTE.com – Prezidensia Republika (PR) kontinua halo sosializasaun kona-ba dokumentu Fraternidade Humana ba eskola sira, iha Munisipiu Vikeke.
Prezidensia Republika liu husi unidade assesoria Fraternidade Humana neebe lidera husi asesor Nuno Horta kontinua sosializa dokumentu Fraternidade Humana ba estudante sira, husi eskola Ensinu Baziku Sentral 01 Vikeke no Ensinu Sekundariu Jerál 04 de Setembru, iha Postu Administrativu Vikeke, Munisípiu Vikeke, durante loron 14 too 15 fulan nee.
Tuir Nuno Horta, liu husi nia aprezentasaun iha loron Sesta (15/11/2024) katak, importante husi atividadenee atu fo hanoin ba foinsae sira, konaba moris sosial iha era agora atu moris nuudár maun alin iha família no sosiedade.
Assesór nee esplika, dokumentu nee sita mos kona-ba tahan no bali labarik sira, katak la bandu maibe kontrola labarik sira iha ransu livre, iha eskola no vida loron-loron iha família atu nunee labarik sira moris iha ambiente neebe bele garante ba sira nia futuru liu-liu assesu ho livre ba edukasaun no moris tuir valor kultural no direitu humanus.
Aleinde nee, ba audensia sira, Nuno Horta afirma, dokumentu nee husu mos atu taun matan ba Katuas no Ferik sira, ema kbiit laek no ema ho difisiensia sira iha sosiedade inklui ema neebe hetan presaun moris husi ema seluk.
Dokumentu Fraternidade Humana assina husi Papa Francisco no Grande Imame Al-Azhar, iha loron 04 Fevereiru 2019 ho objetivu fo hanoin hikas ba ema hotu, atu bolu malu nuudár maun-alin atu tane justisa no dame iha mundu no respeita direitus humanus no liberdade relijioza.
Timor Leste adopta dokumentu Fraternidade Humana nuudar dokumentu nasional iha tinan 2019 liu husi aprovasaun Parlamentu Nasional no tuir planu iha tinan 2025 sei sai nuudar kurrikulum ida iha ensinu baziku no ensinu sekundariu.
(eme)
