DILI, STLTIMORLESTE.com – Prezidente Republika (PR), Jose Ramos Horta sujere ba Governu kria fundu kafe espesial, nunee kafe folin tun Governu bele fasil halo kontrola.
Xefe Estadu hatoo kestaun nee liu husi nia diskursu, bainhira partisipa iha eventu loron Masakre Santa Kruz no loron Joventude ba dala 33, iha Santa Kruz, Balide, Dili, Tersa (12/11/2024).
Horta dehan, nia bele halo deit advokasia koalia halo publisidade no loby governu para tau matan no tau orsamentu ba reablitasaun kafe nee mak Prezidente Republika nia mandatu, Prezidente nia mandatu halo marketing iha mundu para ema sosa kafe Timor nian.
“Mandatu Prezidente Republika nian buka haree buka tulun produtur kafee tulun oinsa Governu mak haree buka kria fundu espesial ida neebe hau temi beibeik fundu kafe, nunee bainhira folin kafe monu iha mundu ita tenke kontrola, kuandu monu governu tama sosa kafe neebe ho folin neebe aas,” katak PR, Horta.
Nia hatutan, sidadaun sira kuda kafe rihun ba rihun iha Gleno neeba nomos iha Railaku, Same no Maubesi, Aileu, ida nee laos la halo. Balun sidadaun sira fukit tanba kafe tuan ona aat liu tan halo reablitasaun deit mos labele ona tenke kuda foun 100%.
(eme)
