DILI, STLTIMORLESTE.com – Prezidente Republika (PR), José Ramos Horta husu Timor oan atu promove utilizasaun tais iha serimonia ofisial sira.
Lia hirak nee Prezidente Republika (PR) José Ramos Horta hatete iha ambitu selebra loron nasional ba tais iha Palasiu Prezidensial, Bairo Pite, Domingu (14/12%2025).
Horta hatete, Tais Timor hanesan patrimoniu kultural dahuluk neebe Timor Leste iha no hetan ona rekonhesimentu husi UNESCO.
Tuir nia, kada motivu no kombinasaun kor idak-idak, espesífiku husi kada munisipiu sira, koalia linguajen ida neebe nonok maibe forte kona-ba pertensa. Padraun uniku sira nee reflete karakteristika husi komunidade oin-oin neebe kesi Timor oan nia hamutuk nuudar nasaun ida deit.
Maibe nia dehan, iha mundu neebe muda lalais ho influensia global neebe makaas, maibe Tais Timor hamriik nuudar pilar ida neebe la nakdoko ba identidade Timor oan nian. Ida nee fo hanoin ba Timor oan sira katak Timor Leste iha unidade hanesan kabas ida neebe soru hamutuk hodi kria tais ida neebe metin liu duke kabas ida deit.
“Atu hametin ita nia identidade nasional mak fo onra ativamente ba patrimoniu ida nee. Mai ita hatais ita nia tais ho orgulhu, laos deit iha okaziaun espesial sira, maibe iha ita nia moris loron-loron no reprezentasaun ofisial sira. Mai ita apoia ita nia mestre soru-m nain sira, guardiañu sira ba konhesimentu antigu ida nee no asegura katak arte sagradu ida nee sei kontinua ba jerasaun sira iha futuru,” hatete PR, José Ramos Horta liu husi nia diskursu iha ambitu selebra loron nasional ba Tais, iha Palasiu Prezidensial, Bairo Pite, Domingu (14/12/2025).
Xefe estadu hatutan, iha loron nasional ba tais nee, Timor oan hotu-hotu tenke kuda espiritu iha idak-idak nia fuan hodi hametin nasaun nee.
“Iha Loron Nasional Tais ida nee, mai ita lori espiritu Tais nian iha ita nia fuan: espiritu reziliénsia, beleza, no orgulhu kulturál neebe labele naksobu, hamutuk hodi fo onra ba ita nia tais, ita hametin ita nia nasaun nia fundasaun,” hatete PR Horta.
Jornalista: Alberto Menezes
Editor: Xisto Mendonça
