DILI, STLTIMORLESTE.com – Prezidente Republika (PR), Jose Ramos Ramos Horta halao enkontru informal badak ho Prezidente Republika Federal Somalia, Hassan Sheikh Mohamud, hodi destaka ligasaun rai rua liu husi adezaun iha g7+
Prezidente Republika Demokratika Timor Leste, enkontru ho Prezidente Republika Federal Somalia Hassan Sheikh Mohamud iha marjen atividade Forum Ekonomiku Mundiál iha Davos, Suisa.
Tuir Komunikadu neebe STL asesu husi media Prezidensia Republika Kinta (23/01/2025) hatete, enkontru nee destaka ligasaun entre Timor Leste no Soamalia liu husi sira nia adezaun iha g7+, organizasaun ida neebe kompostu husi nasaun sira neebe iha situasaun frajil no pos-konflitu.
Somalia hanesan membru ativu ida husi grupu ida nee, neebe halibur nasaun 20 husi rejiaun oin-oin, inklui Afrika, Azia-Pasífiku, Mediu Oriente no Karibe.
Ida nee harii iha tinan 2010, g7+ promove kooperasaun entre ninia membru sira atu rezolve dezafiu komun sira relasiona ho rekonstrusaun pos-konflitu, fortalesimentu institusional no promosaun dezenvolvimentu sustentavel.
Enkontru nee reforsa kompromisu mutuo entre Timor Leste no Somalia hodi kolabora iha ambitu espíritu g7+ nian, ho objetivu atu harii futuru ida neebe estavel no reziliente liu ba sira nia povu.
Aleinde nee Prezidente Republika mos hasoru halao enkontru informal ho Diretora Jeral Organizasaun Internasional ba Migrasaun (IOM), Amy Pope iha marjen Enkontru Anual Forum Ekonomiku Mundial iha Davos.
Enkontru nee destaka husi Diretora Jeral Pope iha nia konta ofisial Twitter, neebe nia sublina oportunidade folin-boot atu envolve ho Prezidente Ramos-Horta iha diskusaun sira kona-ba kestaun global sira neebe afeta jestaun fluxu migrasaun nian.
Ida nee marka enkontru daruak entre líder nain rua, hafoin sira nia enkontru dahuluk iha Nova Iorke iha loron 21 fulan-setembru tinan 2023, durante Sesaun ba dala 78 husi Asembleia Jeral Nasoins Unidas nian (UNGA). Iha tempu neeba, Pope mak Diretora Jeral eleitu, prepara atu asumi ofisialmente nia kargu iha Outubru 2023.
Sira nia dialogu kontinua iha Forum Ekonomiku Mundial hatudu kompromisu neebe lao hela atu rezolve dezafiu sira migrasaun global nian liu husi envolvimentu diplomatiku nivel aas.
(eme)
