DILI, STLTIMORLESTE.com – Prezidente Republika (PR), Jose Ramos Horta apoiu nesesidade baziku ba familia kbiit natoon iha Munisipiu Kovalima.
Prezidente Republika, Jose Ramos Horta ba jornalista sira iha Administrasaun Kovalima, Kuarta nee (26/03/2025) hatete, vizita mai Kovalima hodi lori netik nesesidade baziku ba komunidade neebe kbiit natoon inklui ema ho nesesidade espesial.
“Foin mai vizita Suai, kleur ona la mai, uluk hau sempre mai iha nee, mai halimar no mai pasiar, ohin hahu ho programa ofisial programa ajuda humanitria elementu membru Governu mos mai iha nee lidera husi Ministru agrikultura ho Visi Ministru no Sekretariu Estadu, hau nia asesor prinsipal parte defeza no seguransa Lere Anan Timur iha nee,” katak PR, Horta
Prezidente Republika dehan, mai Suai hodi haree deit situasaun, hodi fo tulun ruma ba kbiit laek sira liu-liu ba ema ho kondisaun defisiensia.
“Laos apoiu iha nee deit, maibe sei ba tan aldeia no suku balun no mai partisipa kurida kuda loke orsida lokraik, no futu manu no ema husi NTT mai barak nomos futu manu dada tali iha atividade oin-oin,” katak PR Horta.
Prezidente Republika hatete, iha eventu nee marka prezensa mos husi membru Governu nomos entidade oin-oin hodi haree idak-idak nia portufoliu.
“Tanba Governu tinan 2025 konsentrasaun makaas ba infraestrutura kunforme Primeiru Ministru koalia,” katak PR Horta.
Nunee mos Xefe Suku Beco, Arlindo Bernardino Lemos sente kontente tanba ho prezensa Prezidente Republika, Jose Ramos Horta iha Kovalima lori mos esperansa, tanba bele apoiu nesesidade bazika ba komunidade vulneravel nomos ema ho defisiensia.
Nunee mos benifisiariu, Armindo Araujo de Amaral husi Suku Labarai hatete, Prezidente Republika, José Ramos Horta fahe ai-haan, nuudar benifisiariu sente kontente.
(eme)
