DILI, STLTIMORLESTE.com – Prezidente Republika (PR), José Ramos Horta viajen ba Singapura hodi partisipa 22 Iss Shangri-La Dialogu.
Iha loron Kinta nee (27/05/2025) Prezidente Republika Jose Ramos Horta halo viajen ba Singapura, hahu husi loron 29 Maiu too loron 4 Junhu 2025, hodi ba partisipa iha Simeira Seguransa Azia nian ba dala 22, neebe konhesidu ho naran IISS Shangri-La Dialogue.
Simeira nee konhesidu nuudar forum primeiru ba dialogu defeza no seguransa iha rejiaun Azia-Pasifiku, halibur hamutuk ofisial senior sira governu nian, ministru defeza sira, no peritu seguransa sira husi mundu tomak hodi koalia kona-ba dezafiu krítiku sira ba seguransa rejional no internasional nian.
Prezidente Ramos Horta sei hatoo deklarasaun prinsipal iha Sesaun Plenaria datoluk kona-ba Jestaun Proliferasaun Risku sira iha Azia-Pasífiku, Prezidente sei aprezenta Timor Leste nia perspetiva kona-ba arma nuklear no proliferasaun teknolojia míssil sira iha rejiaun.
Prezidente sei partisipa mos iha Meza Redonda Prezidensial ba Lideransa Foinsae sira, hodi fahe reflesaun sira kona-ba papel parseria estratejika sira nian iha reforsu arkitetura seguransa rejional iha Ázia Pasífiku no tuir mai sei hatan ba pergunta sira neebe líder foin sira neebe prezente husu.
Prezidente Ramos Horta sei sei halao sorumutuk bilateral ho lideransa Singapura nian, inklui S.E. Tharman Shanmugaratnam, Prezidente Singapura, S. E. Lawrence Wong, Primeiru Ministru Singapura, no Sr. Chan Chun Sing, Ministru Defeza.
Prezidente Ramos Horta sei partisipa iha sesaun plenaria oin-oin neebe kobre topiku kritiku sira hanesan seguransa Indo-Pasífiku, dezafiu sira defeza sibernetika no espasu liur, no parseiru seguransa global Xina nian.
“Partisipasaun nee reflete envolvimentu Timor Leste nian neebe buras iha asuntu seguransa rejional no ninia kompromisu atu kontribui konstrutivamente ba estabilidade Azia-Pasífiku. Nuudar nasaun ida neebe tranzisaun ho susesu husi konflitu ba pas ho apoiu internasional, Timor Leste oferese kobesimentu valiozu kona-ba rezolusaun konflitu, konstrusaun dame, no dezenvolvimentu demokratiku,” dehan Prezidente Ramos Horta.
Simeira nee sei iha sesaun plenaria oin-oin, diskursu espesial sira, no sesaun servisu simultaneu sira neebe kobre inovasaun defeza, jestaun krize rejionwl, no kooperasaun seguransa marítima. Simeira nee remata ho diskusaun kona-ba hametin kooperasaun seguransa ba Azia-Pasífiku neebe estavel.
Prezidente Republika Jose Ramos Horta sei fila hikas mai Timor Leste iha loron 4 fulan Junhu 2025.
(eme)
