ERMERA, STLTIMORLESTE.com – Prezidente Republika (PR), Jose Ramos Horta halao vizita ba akampamentu Internasional Permayouth Convergence (IPYC) iha Munisípiu Ermera.
Xefe Estadu ba jornalista sira, iha Gleno, Kuarta (22/10/20250) hatete, vizita akampamentu nee laos premeiru vizita, maibe ba segundu vez ona.
“Hau fo parabens no agradesimentu boot ba Ego Lemos neebe hatudu nia domin no matenek, ba natureza, ba ai laran bee matan sira nee, tanba problema bee iha Timor iha NTT iha mundu problema boot tebes, I komunidade barak laiha liu bee no sira be asesu nee laiha kakutak para trata bee ho didiak, ita haree iha Dili loke torneira koa kanu, laos iha Dili deit iha foho mos fatin balun husik bee estraga arbiru,” dehan PR, Horta.
Iha biban nee Prezidente Republika fo apoiu tomak ba Ego Lemos ho nia ekipa, maibe Governu nunka apoiu duit metan ruma, tanba element Governu laiha konsiensia ba problema bee nee grave.
“Dala ida tan nee hanesan dala rua hau mai iha nee iha fatin ida nee ho alin Ego Lemos neebe enviadu espesial Prezidente Republika nian ba Mudansa Klimatika, Maiu Ambiente, Ego Lemos hotu hotu hatene artista enveromen lista no ativista boot internasional klaru hau apoiu makaas nia serbisu, tanba nia serbisu nee ba nasaun,” dehan PR, Horta.
Xefe Estadu hatete, horiseik mak too husi Melbour ba Australia tanba iha neeba sira selebra boot tinan 50 akontesimentu iha Balibo bainhira iha neeba fulan Outubru 1975 Prezidente Republika iha neeba jornalista nain 5 mak mate, kuitadu familia sira televizaun boot iha Australia halo eventu boot.
“Hau foin too horiseik bainrua 24 tenke aranka ba Kuala Lumpur ba simeira ASEAN neebe Timor tama ofisialmente. Maibe servisu barak todan, kuandu jornalista lubuk ida husi mundu kontaktu hau lakohi falta importante tebes bee, iha planeta seluk rai seluk iha mundu nee universu nee hatete planeta naran mate laiha vida tanba laiha bee. Rai balun iha mundu ida nee bee laiha, ita iha Timor Leste bee iha mais ladun,” dehan PR, Horta.
Tinan 20 resin Prezidente Republika koalia makaas kona-ba bee no Prezidente rasik koalia ona ho Primeiru Ministru, oinsa mak prezerva bee liu husi debu.
“Hau koalia ho maun Boot Xanana uluk kedas iha hau nia primeiru Mandatu favor halo debu ba bee, nunee ita simu udan been labele gasta bee arbiru nee duni hau konsidera programa ida nee neebe Ego Lemos ho ekpa ho imi halo importante ba futuru nasaun ida nee,” hatete Xefe Estadu.
Iha fatin hanesan Diretor Permayouth, Ego Lemos hatoo agradese ba Prezidente Republika, Jose Ramos Horta neebe vizita ona akampamentu iha Gleno.
“Hanesan hau informa katak ita ohin dader iha ita nia bainaka espesial mak ita nia nain Prezidente Republika, Jose Ramos Horta ita partisipante maizumenus 800 iha nee iha nasaun 19 mak iha nee, kolega sira neebe mai husi dook sira seluk rasik sira nia viajen mai atende akampamentu ida nee,” dehan nia.
Nia hatutan, Prezidente Republika mak hanesan ema neebe advoka no apoiu makaas ba akampamentu ida nee, tanba nee agradese tebes, Prezidente Republika maske okupadu la halimar mais konsege mai hamutuk ho ida nee hanesan buat espesial.
Jornalista: Emerenciana Pinto
Editora: Carme Ximenes
