DILI, STLTIMORLESTE.com – Prezidente Republika José Ramos Horta halao vizita Estadu ba Bangladesh, hodi marka momentu signifikativu iha relasaun diplomatika, no ohin hahu vizita Memorial Nasional Martir.
Tuir komunikadu neebe STL asesu iha Segunda (16/12/2024), Prezidente Ramos-Horta sei vizita Memorial Nasional Martir nian iha Savar, hodi fo respeitu ba martir sira husi funu libertasaun Bangladesh nian.
Prezidente Ramos Horta vizita estadu istoriku dahuluk ba Bangladesh husi loron 14 too loron 17 fulan-Dezembru 2024, hodi marka momentu signifikativu ida iha relasaun diplomatika sira entre nasaun rua nee.
Bainhira too, Prezidente Ramos-Horta simu husi Honoravel Konselleiru Xefe Muhammad Yunus (Primeiru Ministru) no simu ho onra estadu nian iha Aeroportu Internasional Hazrat Shahjalal.
Iha loron 15 Dezembru, Prezidente Ramos Horta halao enkontru privadu ho Honoravel Konselleiru Xefe Dr. Muhammad Yunus (Primeiru Ministru), tuir kedas ho diskusaun bilateral entre delegasaun nasaun rua nian.
Líder sira sei asiste serimonia asinatura Memorandu Entendimentu (MoU) 2, entre Ministeriu Negosiu Estranjeiru kona-ba akordu Izensaun Vistu no Konsulta Regular Gabinete Estranjeiru, tuir ho konferensia imprensa konjunta. Iha vizita ida nee, anunsia estabelesimentu Konsuladu Onorariu Timor Leste iha Bangladesh.
Iha kalan Prezidente Ramos-Horta sei partisipa iha bankete estadu nian neebe oferese husi Honoravel Konselleiru Xefe iha Salaun, Pan Pasífiku Sonargaon Dhaka.
Iha loron 16 Dezembru, Prezidente Ramos Horta sei vizita Memorial Nasional Martir nian iha Savar, hodi fo respeitu ba martir sira husi funu Libertasaun Bangladesh nian.
Prezidente Ramos Horta sei halao sorumutu ho Honoravel Prezidente Bangladesh nian, Mohammed Shahabuddin, iha Bangabhaban. Líder rua nee sei partisipa iha serimonia resepsaun hodi selebra loron Vitoria Bangladesh nian ba dala 54. Serimonia nee sei inklui toka hinu nasional nasaun rua nian, hahu ho Bangladesh nian tuir kedas ho TL nian.
Iha loron 17 Dezembru, Prezidente Ramos Horta sei hatoo palestra publika iha Institutu Estudu Internasional no Estratejiku Bangladesh nian (BIISS) kona-ba dezafiu ba pas iha mundu kontemporáneu.
Prezidente mos sei halao sorumutu iha salaun munisípiu ho estudante no líder juventude sira, hodi fahe ninia esperiensia sira kona-ba TL nia luta ba independensia, viajen lideransa nian, no aspirasaun nasaun nian hafoin independensia.
“Vizita istoriku ba Bangladesh reprezenta laos deit kompromisiu diplomatiku, ida nee hanesan testamunha ida ba amizade neebe dura, entre ita nia nasaun sira no papel importante Bangladesh nian hodi apoiu viajen TL nian ba pas no estabilidade “, hatete Prezidente Ramos Horta.
PR Horta dehan, bainhira hametin ligasaun bilateral sira, hein atu esplora dalan foun ba kooperasaun neebe sei fo benefísiu ba povu sira no kontribui ba prosperidade rejional.
Vizita Estadu dahuluk husi Prezidente Ramos Horta ba Bangladesh sublina parseria neebe buras daudaun entre Timor Leste no Bangladesh, partikularmente bainhira TL hakbesik ba adezaun tomak ba ASEAN iha 2025-2026, hodi loke posibilidade foun ba kooperasaun no dialogu rejional.
(eme)
