DILI, STLTIMORLESTE.com – Prezidente Republika (PR), Jose Ramos Horta vizita trabalhu ba Monako husi loron 23 too 25 Junhu 2025, hodi hametin Timor Leste nia parseria internasional sira no avansa kooperasaun rejional.
Tuir imformasaun neebe mak STL asesu kuarta nee (25/06/2025) katak, Prezidente nia vizita trabalhu ba Monaku hahu husi loron 23 too 25 Junhu sublina diplomasia multilateral no envolvimentu juventude liu husi atividade xave balu.
Iha vizita nee Prezidente Ramos Horta halo enkontru ofisial ho autoridade Monegasku sira no partisipa iha kompromisu diplomatiku sira ho nivel aas. Pontu importante mak sesaun interativu ho estudante internasional liu 40, promove dialogu kona-ba asuntu global no fahe esperiensia dezenvolvimentu uniku Timor Leste nian.
Programa nee inklui almosu ho nivel aas ho distintu konvidadu nain 20 no partisipa iha atividade sira husi Fundasaun Prinsepe Alberto II neebe foka ba sustentabilidade ambiental no asaun klimatika.
Vizita sira nee mos sublina Prezidente Ramos Horta nia esforsu kontinua atu diversifika parseria internasional Timor Leste nian no asesu oportunidade foun iha edukasaun, kuidadu saude, no dezenvolvimentu sustentavel.
Aleinde nee, Sekjen G7+ Helder da Costa hatete, Prezidente Republika mos halo enkontru bilateral ho Alberto II Principe do Monako no Prezidente mos halo sesaun ho joventude sira husi monako nia hodi koalia konaba esperensia harii pas oinsa promove pas husi Prezidente Republika ba joven sira nomos ho almosu ho entidade lubuk ida ho 20 konvidadus.
“Iha lokraik iha diskusaun meza redonda entre Fundasaun Post Konflitu ho G7+ tanba tinan rua liu ba ita asina Mou entre fundasaun Post konflitu ho G7+ iha Lisboa no ohin ita simplesmente halo vizaun ida kona-ba saida mak ita alkansa ona no saida mak ita tenke halo, entau ohin sira mos aprezenta projetu oan ida atu publika livru oan ida konaba menu aihan husi pais G7+ sira nia,” katak nia.
Aleinde nee Prezidente Republika mos koalia assuntu oin-oin ho entidade iha Monako oinsa mak bele hametin relasaun bilateral rai rua iha futuru.
(eme)
