DILI, STLTIMORLESTE.com – Maski transporte publiku hanesan taxi no mikrolet barak ona iha kapital Dili, maibe komunidade sira hili sae liu transporte roda tolu ka Tum-Tum, ho razaun tanba Tum-Tum oferese servisu neebe pratiku, lais no bele tama too estrada ka luron kiik sira.
Tuir rezultadu entrevista ho pasajeiru balu iha area Komoro dader nee sira dehan katak, sae Tum-Tum kman liu tanba la presiza hein tempu naruk iha helte laran.
“Hau gosta sae Tum-Tum tanba sira lori ita too kedas odan-matan. Se sae mikrolet, ita tenke tun iha estrada ka luron boot, depois tenke lao ain tan ba uma. Maibe ho Tum-Tum ita selu uituan deit mos sira lori too uma oin kedan,” dehan kamunidade ka pasajeiru, Martinha da Silva Soares ba STL, Sesta (20/02/2026).
Aleinde pratiku, pasajeiru ka komunidade sira sente katak Tum-Tum mak solusaun diak liu bainhira sidadae Dili hasoru macet iha oras dader no loron manas, ho modelu veikulu neebe kiik motorista sir abele selip iha veikulu boot sira nia leet hodi too fatin ho lais.
Iha fatin hanesan Estudante Univeritariu ida ho naran, Duarte Mendonca sente kontenti sae Tum-Tum tanba bele negosia presu ka folin, ”Ita bele negosia folin ho motorista sira. Se ita nia osan uituan deit, ita bele kolia diak ho sira, sira mos komprenda tanba ita estudante. Nunee mos sira dala barak putar muzika neebe halo ita la baruk atu rona,” Duarte hatete.
Nunee mos Motorista Tum-Tum, Justino Mota da Costa hatete, iha loron ida nia bele hetan rendimentu entre US$ 15.00 too US$ 40,” Kompetisaun agora makas, tanba Tum-Tum barak ona, maibe kliente ka pasajeiru nafatin iha, liu liu iha tempu dadaer no loron manas,” dehan Justino.
Entretantu daudaun nee numeru Tum-Tum iha Dili aumenta makaas, tanba demanda husi komunidade ka pasajeiru neebe boot.Maski nunee komunidade sira nafatin espera katak motorista sira bele mantein seguransa hodi halai neneik ho velosidade neebe perigu, maski sira buka atu too fatin ho lais.
(car)
