LAGA, STLTIMORLESTE.com – Pre- Eskolar Komunidade Sentru Eden Samaguai, iha Suku Tekinomata, Postu Administrativu Laga, Munisipiu Baukau, laiha livru aprendizajen no menus mobiliariu hanesan meza kadeira ba estudante sira.
Prezidente Pre-Eskolar Sentru Eden Samaguai, Levi Ximenes Vital esplika, Pre-Eskolar Eden Samaguai harii husi joven Relijiaun Asembelika de Deus iha tinan 2019, tanba Postu Administrativu Laga seidauk eziste Pre-Eskolar publiku no privadu, nunee joven husi Religiaun Asembelika de Deus iha Samaguai, Suku Tekinomata, Postu Laga inisia planu harii Pre-Eskolar refere ho naran Pre-Eskolar Sentru Eden Samaguai hakarak fasilita labarik sira asesu edukasaun nivel primeiru molok kontinua ba eskola ensinu baziku tuir mai. Maibe husi inisia too ohin loron parte Ministeriu Edukasaun seidauk fo apoiu libru literasia no numerasia ba eskola refere hodi ajuda labarik estudante sira nia prosesu aprendizajen.
“Pre-Eskolar Eden difikuldade boot neebe ami hasoru iha nee liga ba materia didatiku aleinde ida nee mos mobiliarius meza kadeira no armariu sira neebe profesores sira presiza tau materia ida nee mak infrenta no bainhira labarik sira numeru aumenta barak ona sira obriga tenke tur iha rai atu nunee sira tuir prosesu aprendizajen,” Elvi hateten ba jornalista sira, iha Samaguai, Kinta (13/11/2025).
Nia sublina, problema laiha livru no mobiliariu ba estudante sira infrenta kedas iha inisiu harii eskola, maibe iha tinan liu ba Institutu Kamoes Kooperasaun Português liu husi Ministeriu Negosiu Estranjeiru ajuda hodi konstrui edifisiu biblioteka unidade ida ba eskola refere, atu asegura livru numerasia no literasia ba estudante pre-eskolar sira hodi asesu, maibe parte eskola laiha livru nunee aprezenta ona ba Servisu Munisipal Edukasaun Baukau alinde mos mobiliarius, maibe seidauk iha rezultadu.
Nia fundamenta, problema laiha livru nee fo impaktu ba labarik estudante sira, maibe durante parte eskola buka meius hodi fo hanorin ba labarik estudante sira too ona tinan 6.
“Nee prezisa duni tau atensaun, tanba nee parte ida atu labarik sira aprende ho diak mak sira prezisa lee livru,” Elvi akresenta.
Prezidente Pre-Eskolar nee husu ba Servisu Munisipal Edukasaun Baukau atu hatoo problema refere ba Nasional, hodi nunee Ministeriu Edukasaun bele solusiona problema refere, tanba baze atu hadia kualidade edukasaun liu liu numerasia no literasia hahu iha pre-eskolar sira, tanba nee prezisa tau atensaun seriu.
Hatan ba kestaun nee Responsavel Pre-Eskolar Servisu Munisipal Edukasaun Baukau Carlos Alberto hateten, parte Responsavel Pre-Eskolar Munisipiu Baukau too ona terenu no haree ona preokupasaun sira hanesan menus meza kadeira no livru ba estudante pre-eskolar nian, tanba nee sei hatoo ba Ministeriu Edukasaun liu husi Servisu Munisipal.
“Kona-ba meza no kadeira nee kompetensia Ministeriu ita husi Servisu Edukasaun Munisipiu, ita sei hatutan ba neeba no kona-ba biblioteka iha Munisipiu Baukau Pre-Eskolar Eden nee mak iha uluk on,a kona-ba livru ita iha neeba laiha maibe ita sei hatoo ba Ministeriu oinsa haree hirak nee,” Carlos Katak.
Responsavel Pre-Eskolar Munisipiu Baukau rekonhese, Pre-Eskolar Sentru Eden Samaguai sei menus meza no kadeira ba labarik estudante sira no Pre-Eskolar sira iha Munisipiu Baukau foin Pre-Eskolar Sentru Eden Samaguai mak iha ona edifisiu biblioteka, maibe seidauk iha livru ba labarik estudante sira atu asesu hodi koinhese numerasia no literasia, tanba nee parte Servisu Munisipal Edukasaun Baukau anota ona sei hatoo ba Ministeriu Edukasaun hodi fo solusaun.
Jornalista: Tomas Reis
Editora: Carme Ximenes
