DILI, STLTIMORLESTE.com – Pre Eskolar Internasional ida iha Munisipiu Likisa seidauk hetan lisensa husi Ministeriu Edukasaun (ME).
Informa Julio da Silva hanesan Diretor Servisu Edukasaun Munisipiu Likisa ba STL via telefone, Kuarta nee (30/04/2025).
“Pre eskolar ida mak seidauk hetan lisensa husi GALA, tanba eskola nee rasik foin mak loke iha tinan ida nee ,tanba sira loke eskola laiha konhesimentu, Munisipiu Likisa nee iha eskola internasional rua, maibe eskola internasional Loyola deit mak akumula hotu, nee eskola internasional, maibe ida pre eskolar nee seidauk iha lisensiamentu, eskola internasional nee bele akumula estudantes iha Munisipiu bele mai, se kuandu loke deit iha Munisipiu Likisa, nee kategoriu eskola internasional,” nia dehan.
Diretor Servisu Edukasaun Munisipiu Likisa nee hatutan, eskola internasional Loyola nee ensinu baziku no ensinu sekundariu ,ida seluk Pre eskolar nee, tinan ida nee foin loke, maibe seidauk hetan lisensa husi ME Liu husi GALA.
Iha fatin seluk, Diretor Servisu Edukasaun Munisipiu Manatuto, Patricio da Cruz Quintao dehan, eskola internasional iha Manatuto nee balun hetan ona lisensa husi GALA, no balun seidauk, tanba ME liu husi GALA mak iha kompetensia halo kontrolu ba eskola sira nee.
“Konaba fo lisensa ba ita nian eskola sira,nee kompetensia husi ME Liu husi GALA,tanba sira mak halo kontrolu ba ita nian eskola sira,nee duni oinsa mak ita nian eskola sira nee bele priense kriteria,atu nunee halao prosesu ensinu aprendizajen ba ita nian estudantes sira,” dehan nia.
Entretantu Kordenador Gabineti Avaliasaun Lisensiamentu no Akreditasaun (GALA)Antonio Tomas Maia,hatete,semana oin hahu halo monitorin eskola internasional iha Munisipiu rua,Lautem no Viqueque.
“Monitoring ba eskola internasional iha Dili ita finaliza ona e ba munisipiu sei hahu iha semana nee,ita sei ba Lautem no Viqueque, depois sei kontinua ba munisipiu seluk,GALA monitorin eskola internasional iha Dili hamutuk 13, no ita manda hotu kedan notifikasaun konba rezultadu monitoring and evaluation atu sira halo tuir saida mak ita rekomenda atu hadia,” dehan nia.
(jac)
