DILI, STLTIMORLESTE.com – Pre Eskolar Moris Foun I husu Ministeriu Edukasaun atu aumenta profesores ba sira nian eskola.
Kestaun nee hatoo husi Koordenadora Pre Eskolar Moris Foun I, Domingas Beatriz da Cunha ba jornalista STL iha nia knaar fatin, Sesta nee (23/05/2025).
“Ami nian kada profesor ida hanorin estudantes nain 50, nee fahe ba grupu ida estudantes 25 no grupu ida seluk mos 25, hamutuk mak 50, tanba ami nian professor iha pre eskolar nee la hanesan ho sekundariu sira nee, ami mai laos sai professor deit, maibe ami mai sai mos hanesan inan, tanba nee ami husu ba Ministeriu Edukasaun atu aumenta tan profesores nain ida nunee mai iha ami nian eskola,” dehan nia.
Domingas dehan, agora daudaun sira nian profesora ida moras hela no sira husu Ministeriu Edukasaun atu bele aumenta profesores ba iha sira nian eskola, tanba hanorin iha edukasaun pre eskolar nee la hanesan ho ensinu sekundariu sira.
“Ita hanorin iha pre eskolar nee tenke pasiensia, tanba ita hanorin labarik idade tinan 4 mai too tinan 5, oinsa ita atu hamaus sira, atu nunee sira bele toman ho ita lalais, dala ruma sira mai primeiru eskola sei tanis no la husik sira nia inan, nee duni ita mak tenke pasiensia,” dehan nia.
(jac)
