DILI, STLTIMORLESTE.com – Dirijente husi Eskola Sekundariu Jeral 10 Dezembru Komoro hahu halao enkontru ho profesores sira, hodi koalia kona-ba preparasaun ba ezame primeiru periodu neebe sei halao iha loron 6 fulan Abril.
Liafuan nee hatoo husi Diretor Eskola Sekundariu Jeral 10 Dezembru Komoro, Manuel Verdial ba STL iha nia knaar fatin ESJ 10 Dezembru, Komoro, Tersa nee (17/03/2026).
“Agora daudaun ami enkontru hodi koalia kona-ba ida nee, oinsa atu harii komisaun organizadora ba iha ezame primeiru periodu ninia, depois prepara pontus ezame ba ita nian estudantes sira, nunee mos ami sei koalia kona-ba disiplina profesores no estudantes sira nian, tanba ezame refere sei halao iha loron 6 fulan Abril tinan ida nee,” katak nia.
Manuel dehan, foin hahu atu halao enkontru ho profesores sira, liu husi enkontru ida nee mak sei halo diskusaun para bele fo rezumu, nunee bele foin hatene ninia rezultadu husi enkontru nee rasik.
“Ba ezame ninia nee, ami sei kria komisaun ida stu profesores hotu-hotu ba iha kada disiplina aprezenta pontu ezame, nunee mos ita haree ba iha disiplina estudantes sira nian ativu ou la ativu, ita haree profesores sira dala ruma oras nee tama hanorin nee la kompletu, iha kurikulu dehan buat seluk, maibe ita dala ruma koalia buat seluk, neebe kualidade nee ita hotu hatene aan hela katak, dala ruma ita dehan estudantes maibe ita rasik mak hanesan nee,” nia informa.
Entretantu Liliana dos Reis hanesan estudante hatete, kada loron profesores sira tama aula hanorin tanba iha tempu besik nia laran sira sei halao ezame primeiru periodu ninia, nunee materia neebe simu ona husi profesor sira, nee bele prepara estuda daudaun ona.
“Hau hanoin kada loron ami nian profesores sira tama aula hanorin, tanba iha tempu besik nia laran sira sei halao ezame primeiru periodu ninia, nunee materia neebe simu ona husi profesor sira, nee bele prepara estuda daudaun ona,” nia haktuir.
(jac)
