DILI, STLTIMORLESTE.com – Servisu Edukasaun Munisipiu Likisa prepara ona ekipa monitoring ba ezame nasional iha eskola idak-idak neebe lokaliza iha munisípiu refere.
Tuir Diretor Edukasaun Munisipiu Likisa, Julio da Silva dehan, konaba eskola idak-idak nian preparasaun ba ezame nasional nee lao hotu ona, tanba nee hein deit ona orientasaun ba kalendariu neebe mak iha, hodi bele realiza ezame nasional ba tinan ida nee. Kona-ba vizilantes sira, prepara hotu ona hodi uza ba eskola ida-idak. Neebe ekipa monitorin ezame nasional husi Munisipiu mos prepara hotu ona.
“Ami nian estudantes finalista neebe atu partisipa iha ezame nasional ba tinan ida nee husi ensinu baziku rihun 575, sekundariu jeral rihun 251 no tekvo 198,” dehan Julio ba STL liu husi telefone, Kinta (25/9/2025).
Iha parte seluk Ministra Edukasaun (ME), Dulce de Jesus Soares hatete, professor sira kontinua selebra ezame pasajen klase no ezame nasional tuir kalendariu neebe iha tiha ona. Ida nee knaar Professor sira nian, maibe ME husu teb-tebes ba komunidade edukativa tomak atu ajuda oan sira, atu nunee iha preparasaun diak ba ezame hirak nee.
“Hau husu ba estudantes no inan aman sira, lider komunidade no professor sira hotu atu halo preparasaun ida ba ita nian oan sira. Iha Outubru nee ita sei iha ezame nasional, no ezame pasajen de klase,” dehan nia.
Nia hatutan, tanba nee husu ba estudantes sira atu iha preparasaun diak ba ezame nasional, tanba ezame nasional no ba pasajen klase mak rezultadu husi tinan tomak sira eskola.
Jornalista: Jacinta Sequeira
Editora: Domingas Gomes
