DILI, STLTIMORLESTE.com – Ensinu Baziku Sentral (EBC – sigla português) Manleuana sei realiza enkontru ho profesor sira, hodi bele kria komisaun organizadora ba preparasaun ezame primeiru periodu, neebe tuir planu sei halao iha fulan Abril nia laran.
Lia nee hatoo husi Diretor EBC Manleuana, Carlos Corrreia ba STL iha nia knaar fatin Manleuana, Kuarta nee (05/03/2025).
“Dia 7 Abril ita nian estudante sira hahu halao ezame primeiru periodu, kona-ba ami nian preparasaun lao normal hanesan baibain, tanba atu hakat ba iha ezame nee ami sei halao enkontru ho profesor sira, enkontru nee ami sei haree tempu, aban Kinta ami sei tama fali eskola, depois mak ami sei desidi loron neebe atu halao enkontru, hodi kria ami nian komisaun organizadora ba ezame refere,” dehan nia.
Carlos hatete, komisaun organizadora nee kria ba ezame primeiru periodu, segundu too tama iha ezame nasional ninia, nee duni Komisaun Organizadora nee forma kedas iha ezame primeiru periodu nee, para segundu ho Ezame Nasional mos Komisaun Organizadora iha ona.
“Ezame primeiru periodu nee ba ita nian estudantes sira terseiru siklu deit, tanba ita nian estudantes balu ita kontinua halo deit avaliasaun ba sira, ami nian profesores ida-idak tama aula, liu-liu ba materia sira nee ita nia profesor tama iha sala, estudante hamutuk 1.888, profesores hanorin 48, sala aprendizajen 15,” nia esplika.
Iha fatin seluk, Diretor Eskola Sekundariu Nobel da Paz, Jeremias P. de Jesus dehan, preparasaun ba ezame primeiru periodu nian nee husi eskola halao preparasaun, liu-liu profesores kada disiplina idak-idak tenke ativu iha sala, ho nunee fo materia ba estudantes sira, tanba iha tempu badak estudante sira sei partisipa iha ezame primeiru periodu.
“Ami nian preparasaun ba ezame primeiru periodu nian nee husi eskola halao preparasaun, liu-liu profesores kada disiplina idak-idak tenke ativu iha sala, ho nunee fo materia ba estudantes sira, tanba iha tempu badak estudante sira sei partisipa iha ezame primeiru periodu,” nia afirma.
Nunee mos Leonita da Costa hanesan estudante husi Eskola Sekundariu Nobel da Paz hatete, tuir informasaun neebe iha, sira sei halao ezame primeiru periodu iha fulan Abril nia laran, ho ida nee hanesan estudantes kada loron presiza ativu iha eskola.
(jac)
