DILI, STLTIMORLESTE.com – Diretora EBC Saun Francisco Natarbora, Madre Mikha, FSGM konsidera edukasaun mak fatin importante ida atu hodi prepara oan sira nia futuru no liu husi edukasaun mak sira bele konhese siensia oin-oin no bele tau iha sira nia pratika loron-loron nian, maibe teoria deit la to’o ba sira nia konhesimentu, tenke ho pratika.
“Ami nia objetivu lori ami nia oan sira mai vizita media Suara Timor Lorosae nee, para sira bele haree direita no aprende prosesu servisu iha media, atu nunee ami nia oan sira ba oin hakarak sai jornalista atu bele haklean sira nia talentu iha area jornalizmu nian,” katak Madre Mikha ba STL hafoin ho nia estudante no profesor sira vizita iha STL Park, Surik Mas, Dili, Kinta (11/9/2025).
Tuir Madre Mikha, antes nee sira vizita ona GMNTV, Radio Televisaun Timor Leste (RTTL) no Radio Timor Kmanek (RTK). Tinan ida nee STL mak tama sira nia ajenda atu vizita hodi hare direita prosesu tomak kona-ba produs jornal.
“Durante nee ami lee notisia STL nian liu husi facebook deit, tanba distansia dook ami labele lee jornal STL. Tanba nee, tinan ida nee STL tama iha ami nia ajenda atu halo vizita no ohin ami realiza duni ajenda vizita STL nee,” katak Madre Mikha.
Aleinde estudante, iha vizita nee, Madre Mikha akompanha husi profesor/a sira neebe hanourin iha EBC Saun Francisco Natarbora mak hanesan Lucrecia d. R. Horta, Carmeneza Pina, Inacio Freitas, Tomazia de Jesus no Leonildo da Costa.
Madre Mikha mos hato’o agradese ba familia boot STL neebe lidera husi CEO STL Media Group, Salvador J. Ximenes Soares, bele simu sira nia estudante ho diak no fo oportunidade ba sira bele hare no rona esplikasaun husi lideransa STL nian kona-ba prosesu tomak servisu iha media STL.
“Ami hanoin servisu iha media nee loron deit, afinal iha mos servisu kalan no loron. Iha jornalista, iha editor, layout, monting no ekipa produs jornal nian. Tanba nee, ohin ami lori ami nia estudante sira mai iha STL atu hatene prosesu tomak servisu iha media STL,” katak Madre Mikha.
Entretantu, profesora Lucrecia d. R Horta hatete katak durante nee sira nia komprensaun servisu iha midia nee jornalista deit, afinal iha ekipa lubuk neebe hanesan korenti ida hodi produs jornal no jornal to’o iha kliente sira nia liman.
“Ami iha ona alunus neebe agora daudaun servisu ona iha midia balun sai hanesan jornalista. Tanba nee, ami lori ami nia oan sira nee mai haree direita para aban bainrua sira hakarak sai jornalista karik sira hatene ona. Iha ami nia eskola ami hanourin mos materia kona-ba publisidade,” katak Horta.
Iha sorin seluk, Manager HRD STL CORP, Marcos da Silva lori familia tomak STL CORP nia naran hato’o bemvindu ba Diretora EBC Saun Francisco Natarbora, Madre Mikha ho nia estudante no profesor/a sira neebe halo vizita iha STL.
Antes vizita sala redasaun no sala makina printing nian, Manager HRD, Marcos da Silva akompanha husi Managing Editor, Mikael Mali Mau enkontru ho Diretora EBC Saun Francisco Natarbora, Madre Mikha ho ninia profesor/a iha salaun enkontru STL CORP.
Iha biban nee Marcos da Silva ho Mikael Mali Mau esplika kona-ba prosesu tomak servisu iha media STL husi jornalista, administrasaun, bisnis, editor to’o servisu loper nian. Depois, lori estudante sira vizita sala redasaun no sala makina printing nian. Iha sala redasaun, estudante sira aprezenta kanta ho muzika angklung. Vizita nee remata ho foto hamutuk.
Jornalista: Mikael Mali Mau
Editor: Mikael Mali Mau
