AMBENO, STLTIMORLESTE.com – Preparasaun fatin isar bandeira Nasional hodi komemorasaun Loron Proklamasaun Independensia ba dala 49, iha 28 Novembru tinan 2024, iha kampu 1 Maiu Palaban, Suku Costa, Rejiaun Administrativa Espesial Oekusi Ambeno (RAEOA) iha loron Sesta (22/11/2024) atinji ona 75%.
“Ita nia prepasaun lao diak, palku nee atu konklui iha aban Sabadu (23/11/2024) remata ona,” dehan MinistruAdministrasaun Estatal (MAE), Tomas do Rosario Cabral neebe asume knaar hanesan Prezidente Komisaun Organizadora ba STL iha Palaban, Sesta (22/11/2024).
Nia haktuir tan katak, preparasaun ba palku, feira, konsertu muzikal, nee Governu sentral mak responsabiliza, maibe ba mobilizasaun masa, ida nee husi parte Rejiaun Administrativa Espesial Oekusi Ambeno (RAEOA) mak mobiliza.
Iha ambitu selebrasaun loron proklamasaun Independensia ba dala 49 iha Oekusi, iha atividade prinsipal sira mak hasae bandeira nasional, kondekorasaun, atribuisaun titulu nain ba rai, neebe sei halao iha kampu 1 Maiu Palaban no ba konsertu muzika no feira kulinaria sei konsentra iha monumentu Lifau.
“Aban (ohinred) lokraik, hahu abertuta feira iha monumentu Lifau, neebe agora komisaun mos prepara ba mobilizasaun masa husi suku 18 iha Oekusi,” nia hateten.
Responde perguntas jornalista kona-ba orsamentu ba komemorasaun loron 28 Novembru, Ministru Administrasaun Estatal la esplika.
“Orsamentu ba preparasaun hau la hatene, agora ami mai servisu neebe diretor nasional sira mak hatene kona-ba alokasaun orsamentu ba selebrasaun nee,” nia salienta.
Tema ba Komemorasaun loron Proklamasaun Independensia Timor Leste ba dala 49 mak “Orgulhu ba ita nia identidade no kultura, ita harii futuru liberdade, justisa no esperansa ba ita nia povu,”.
Tuir informasaun neebe STL asesu husi fontes neebe fiar, governu hahu aloka ona orsamentu ba kada seksaun mak hanesan tuir mai nee, Seksaun Sekretariadu US$ 9,250, Seksaun CIBN US$ 47,885, Seksaun Protokolo US$ 27,510, Seksaun Seguransa kompostu husi PNTL osan US$ 32,040 no FFDTL US$ 83,598 total hamutuk US$ 115,638. Nunee mos aloka osan ba Seksaun Saude US$ 8,520, Seksaun Divertimento US$ 2,880, Seksaun Lojistika no Transporte US$ 80,405, Seksaun Publikasaun la iha, Seksaun Feira/Exposisaun US$ 57,360, Seksaun Arte no kultura US$ 14,210, Seksaun Konsumu US$ 21,720, Seksaun Liturgia US$ 7,810, no seksaun Mobilizasaun Masa US$ 26,780.
(jos)
