DILI, STLTIMORLESTE.com – Governu liu husi ministeriu relavante presiza aplika regra ba ema sira neebe utiliza motor eletrika iha Timor Leste.
Visi Diretor Hak, Antonino de Limas ba jornalista sira iha knaar fatin Farol, Kinta (26/02/2026) husu governu liu husi Diretora Diresaun Nasional Transporte Terrestre presiza duni aplika regra ba ema sira neebe utiliza motor eletrika iha Timor Leste.
Vise Diretor hatete, fila fali ba regra, tanba ida nee ligadu ho uzu ba estrada publiku, primeriu nee seguransa ba ema sira neebe utiliza motor eletrika nee, entaun seguransa ba sira nia aan rasik, karik governu haree atu regulariza ida nee diak hotu, nunee sira mos kumpri regra, tanba barak mak utiliza estrada nee ba ema sira lao ain mos utiliza, ba ema sira neebe sae motor, kareta hotu-hotu utiliza dalan hanesan, entaun presiza regulariza.
“Hau hanoin aseita presiza haree mos idade, tanba ema sira neebe idade seidauk too nee laiha disiplina bele mos hamosu dezastre barak bainhira iha dalan boot sira. Bainhira koalia kona-ba seguransa ba aan rasik nee atu utiliza helem, presiza karta kondusaun,” dehan nia.
Antes nee, iha loron 26 Janeiru 2026, Governu liu husi Diretora Diresaun Nasional Transporte Terrestre, Maria Antonia, hateten sira sei prepara lei enkuadramentu ida hodi regula utilizasaun motor eletriku iha Timor Leste.
Tuir observasaun neebe STL hetan, daudaun nee motor eletriku utiliza barak husi labarik neebe minoridade hodi tula malu halo movimentu ba mai iha sidade Kapital Dili, maibe la uza kapasete, ida nee pegirozu mos ba sira nia saude.
(eme)
