BAUKAU, STLTIMORLESTE.com – Autoridade Suku Abu husu parte Igreja Katolika iha Timor Leste no Governu presiza estabelese regras ba vizitante sira neebe hakarak halo viajen ba Kristu Liurai iha Foho Matebian, Postu Administrativu Kelikai, Munisipiu Baukau.
Lia hirak nee hatoo husi Xefe Suku Abu, Fidelio Sarmento dos Santos ba STL liu husi telefone, Segunda nee (14/10/2024).
“Hau husu ba parte igreja no governu atu kria regulamentu ruma iha Foho Matebian para minimiza insendiu. Tanba la halo regulamentu ema idak-idak lao tuir nia hakarak, halo aktu estraga komunidade sira nia sasan, impaktu mos ba uma lisan sira,” nia rekomenda.
Autoridade Suku nee deklara, parte igreja no governu mak tenke iha koordenasaun hodi halo regras ba vizitante sira no destaka seguransa halo pasa revista ba vizitante sira inklui rejistu naran no sasan neebe vizitante sira lori, molok ba fatin estatua Kristu Liurai.
Nia sublina, Foho Matebian eziste ho sitiu turizmu relijiozu, kultural no istoriku konselhu ho naran estatua Kristu Liurai Foho Matebian, neebe kada tinan fulan Outubru sarani sira feto mane iha Baukau inklui husi fatin seluk sempre ba iha fatin refere hodi hasae orasaun, maibe sempre akontese insendiu florestal neebe deskonfia sunu husi vizitante sira.
Fidelio akresenta, insendiu neebe durante akontese iha Foho Matebian dala 4 ona, neebe ema deskonhesidu sunu duut mak alastra ba komunidade sira nia uma hela fatin no uma lisan too mutuk.
Nia sublina, insendiu refere sempre akontese iha fulan hanesan neebe iha tinan 2012 alastra ba uma lisan 16, uma hela fatin 1 too mutuk inklui ema nain 2 lakon vida, tanba ahi han.
Hatan ba kestaun nee, Administrador Postu Kelikai, Paul Jacinto Moreira hateten, relasiona ho insendiu neebe kada tinan sempre akontese iha area Foho Matebian, Autoridade Postu iha ona inisiativa atu implementa Tara Bandu iha nivel postu hodi eduka sidadaun sira respeita ambeinte kada suku.
“Ba futuru ita sei koordena kria esbosu ida preparasaun Matebian nian, neebe ita sei koalia,” nia hateten.
Enkuantu Padre Parokia Santa Terezinha Kekikai, Justiniano de Sousa fundamenta, regras vizitasaun ba Kristu Liurai Foho Matebian estabelese inisiu tinan 2018 katak, viajen ba fatin refere tenke tuir orariu iha loron 11 Outumbru, maibe peregrinu sira nafatin hakat liu, tanba iha loron 08 Outubru hahu ona nia viajen.
Nunee parte igreja parokia Kekikai iha ona hanoin atu enkontru ho Autoridade Suku, Postu inklui parte seguransa atu kria regras neebe rigorozu liu tan hodi regulariza peregrinu sira.
(EST 2)
