DILI, STLTIMORLESTE.com – Governu iha planu no politika neebe responsivu ba jeneru no inkluzaun, maibe presiza haforsa liu tan nunee bele atinji objetivu.
Feto Potensial Maria Amaral ba STL iha nia knaar fatin Kaikoli, Kuarta nee (09/07/2025) hatete, agradese ba Governu neebe mak iha politika diak ba asuntu igualdade jeneru, maibe lei neebe mak iha presiza haforsa liu tan nunee bele atinji saida mak hakarak atu halo.
“Governu iha politika diak oinsa reforsa feto nia partisipasaun iha politika, nomos oras nee daudaun Governu liu husi Sekretariu Estadu ba Igualdade (SEI) neebe kolabora ho linas ministeriu oin-oin atu luta ba igualdade jeneru, maibe parte hotu presiza reforsa kompromisu neebe Governu iha, nunee luta ba igualdade jeneru nee bele atinji nia objetivu,” dehan Maria.
Nia hatete, parte hotu presiza luta makaas oinsa bele atinji objetivu Governu nian hodi fo oportunidade ba feto hodi partisipa iha vida politika, ekonomia sosial no seluk tan.
Nia hatete, ohin loron feto barak mak inklina aan iha vida politika no ekonomia, maibe sei menus kompara ho mane, tanba nee luta makaas oinsa mak bele fo oportunidade igual entre feto no mane atu foti desizaun nomos partisipa iha atividade hotu.
“Ita nia lei iha ona hodi garante feto nia direitu atu bele partisipa iha vida politika, ekonomia no seluk tan, maibe ita haree numeru sei menus kompara ho mane, tanba nee parte hotu-hotu presiza haforsa malu hodi halo sosializasaun laos iha nasional maibe too iha area remotas sira,” katak nia.
Nunee mos tuir Sekretaria Estadu ba Igualdade, Elvina Sousa Carvalho hatete, presiza intervensaun liu husi implementasaun programa multi sektoral sira no lei no politika sira neebe responsive ba jeneru no inkluzaun.
“Nunee mos reforsa implementasaun kompromisu nasional no internasional sira ba igualdade jeneru hanesan konvensaun kona-ba eliminasaun forma diskriminasaun hotu kontra feto no labarik no ema ho defisiensia,” katak SEI.
Nia hatete, Governu liu husi Sekretaria Estadu ba Igualdade kontinua haforsa advokasia koordena no lidera implementasaun deklarasaun Maubesi nuudar resposta ka hatan ba situasaun hotu neebe kontra feto no labarik feto.
Tuir observasaun neebe mak STL hetan husi mata dalan ba implementasaun no Monitorizasaun Deklarasaun Maubisi ba faze da tolu hatete, SEI nia mandatu bazeia ba dekretu lei numeru 74/2023 iha loron 14 fulan setembru konaba organika SEI nia define katak SEI halao nia mandatu no poder atu promove igualdade iha lei politika, publika, planu estratejiku no operasional sira, programa no orsamentu estadu hodi promove igualdade jeneru no inkluzaun no hasae koinesementu publiku nia atu atu elimina diskriminasaun, prevene no kombate violensia hasoru feto no labarik feto no promove feto iha vida sosiu ekonomiko politika no pozisaun foti desizaun.
(eme)
