DILI, STLTIMORLESTE.com – Parlamentu Nasional (PN) presiza halao revizaun ba artigu 67 husi Konstituisaun Republika Demokratika Timor Leste (RDTL), tanba Timor Leste nasaun ida neebe kiik la presiza orgaun soberania 4, maibe iha 3 deit sufsiente ona.
Kestaun nee hatoo husi Jurista Sergio Dias Quintas ba STL iha Kaikoli, Dili, Tersa (02/12/2025).
“Artigu neebe presiza hodi halo revizaun maka artigu 67 husi konstituisaun, Timor Leste hanesan pais ida kiik la presiza orgaun soberania estadu 4 iha 3 deit sufisiente ona, mak Prezidente Republika hanesan mos Xefe Estado no Xefe Governo, Parlamentu Nasional no Tribunal,” dehan Sergio.
Nia hatutan, orgaun soberania 3 mais efisiente no efikaz hodi halo servisu estadu nian du ke orgaun soberania 4, tanba nee kestaun nee importante tebes ba nai Deputadu sira neebe tuir seminariu hodi haree.
“Se PN realiza seminariu hodi rona parte hotu molok atu halo revizaun ba konstituisaun, nee importante tebes tanba durante dekade rua resin Timor-Leste hari orgaun soberania estadu baseia ba norma fundamental husi Konstituisaun RDTL liu husi prosesu ida naruk to ohin loron,”hatete jurista nee.
Jurista nee afirma, liu husi seminariu nee meus ida hodi hanoin hikas katak, Konstituisaun RDTL bele halo revizaun kalae sekarik halo revizaun iha parte neebe maka nesesariu hodi halo revizaun.
Jurista nee mos hatoo nia hanoin katak, iha tinan hirak ba kotuk Timor Leste atraveza husi krize politiku ida, tanba multi interpretasaun ba norma konstitusional, tempu to ona hodi halo revizaun ba normal balu iha konstituisaun, tanba la relevante ba realidade Timor Leste ohin loron.
Iha fatin hanesan, Akademiku UNTL, Sebastiao Dos Santos dehan, bele halo revizaun ba Konstituisaun, maibe tenke rona hanoin husi parte hotu.
“Bele halo maibe fo hanoin atu rona hanoin husi parte hotu nian, nunee banhira halo ona revizaun, la iha tan prekupasaun balu,” dehan nia.
Nia dehan, se la rona hanoin sira halo tiha revizau bele mos fali preokupasaun balu, ho ida nee dalan diak rona uluk entidade sira sosiedade sivil no akademiku sira nia hanoin, tau hamutuk tetu didiak antes halo revizaun.
Jornalista: Terezinha De Deus
Editora: Carme Ximenes
