DILI, STLTIMORLESTE.com – Jurista Sergio Dias Quintas hatete, preziza duni halo revizaun ba iha norma konstituisaun, tanba artigu balu la relevante no la refleta realidade iha Timor Lesta.
“Primeiru pontu maka nain Deputadu sira no ita hotu hanoin lisu ba sera ke sistema semi Presidensial sei relevante ba realidade Timor Lesta ka lae, tuir hau nia hare pais ida hanesan Timor Leste la nesessariu ona ita opta sistema ida nee, tanba sistema ida nee halo Timor Leste monu iha krize politiku iha tinan hirak ba kotuk no ate agora ita hotu sei sente nia efeitu, “dehan Sergio ba STL, iha Kaikoli, Segunda (15/09/2025).
Nia kestiona Timor Leste pais ida kiik no kiak nusa maka tenki kria orgaun saberania estadu barak-barak, hodi gasta osan povu ba orgaun estadu sira nee.
“Bainhira separasaun poder estadu barak liu ita la konsege define didiak nee, sai problema no mal gastu ba ita nia estadu rasik,” katak jurista nee.
Jurista nee mos hanoin revizaun ba Konstituisaun RDTL iha artigu 67 nee importante espera katak, iha futuru opta deit sistema Presidensial signifika, Presidente Republika nuudar Eefe Estadu ao mesmu tempu nuudar Xefe Governu, halo amandamentu ba artigu refere hodi estebelese orgaun estadu nee 3 deit hanesan, Presidente Republika, Parlamentu no Tribunal sira.
Iha fatin ketak, Jurista Fernando da Costa deklara katak, tempu ona hodi halo revizaun ba lei neebe iha. “Hau hanoin tempu ona atu halo revizaun ba ita nia konstituisaun, maibe kabe ba iha PN,” dehan nia.
Jornalista: Terezinha De Deus
Editora: Carme Ximenes
