DILI, STLTIMORLESTE.com – Estudantes no profesores sira husi Ensinu Baziku Central (EBC) Manleuana kada loron nafatin halo limpeza iha areador eskola.
Asuntu nee hatoo husi Diretor Eskola EBC. Manleuana, Carlos Correia ba jornalista STL, Tersa nee (03/03/2026).
“Ita presiza eskola nee iha ambiente neebe mak moos, tanba nee ami nian estudantes no profesores kada loron sempre halo limpeza iha areador eskola nian, nunee ita bele evita susuk iha tempu udan no ami mos husu ami nian estudantes sira oinsa atu tau lixu iha fatin neebe mak ami prepara ona,” katak nia.
Carlos esplika, dader estudantes sira mai eskola antes tama iha aula, primeiru halo limpeza iha areador eskola, tanba agora daudaun nee moras dengue lao hela, uluk husi parte saude lori aimoruk mai rega iha eskola.
Nunee mos Kordenador Eskola Baziku filial (EBF) Fatumeta, Manuel Pires hatete, kada loron profesores no estudantes sira sempre halo limpeza iha areador eskola no sala aprendizajen idak-idak, dader molok halao aprendizajen halo uluk limpeza, nunee mos meudia antes halao aprendizajen, primeiru halo uluk limpeza, atu nunee bele evita susuk iha eskola.
“Ami nian parte koordena ho saude diak tebes, iha programa ida atu husik susuk ida hamate susuk dengue ninia nee iha ami nian eskola ami husu nafatin, too agora husi saude seidauk lori aimoruk mai rega, maibe sira husik deit mak susuk ida atu prevene moras dengue nian nee, too agora ami nian estudantes seidauk afeita ba moras ida nee, maibe karik ba oin mak iha, nee ami sei koopera ho saude bele mai rega aimoruk iha ami nian eskola,” nia dehan.
Nia hatutan, kona-ba limpeza ninia, loron ida limpeza dala rua, dader no meudia, sira husu ba estudantes sira oinsa atu tau lixu iha fatin, tanba limpeza nee importante tebes hodi prevene aan husi dengue, tanba moras ida nee liu husi susuk neebe tata, sira laos haruka estudantes deit mak halo limpeza, maibe hamutuk ho sira nian profesores sira mak halo limpeza, loron ida halao dala rua.
(jac)
