DILI, STLTIMORLESTE.com – Atu halo mundansa ba iha setor justisa, presiza harii Tribunal Primeira Instansia iha munisipiu hotu.
“Setor justisa atu iha mudansa diak liu tan tenke harii Supremu Tribunal Justisa, no mos Tribunal Primera Instansia iha munisipiu sira hotu, tanba agora foin iha deit Dili, Baukau, Oekusi no Suai,” dehan Jurista Alexandre Corte Real ba jornalista STL iha Kaikoli, Dili, Sesta (05/09/2025).
Maibe nia dehan, ohin loron iha Munisipiu balu tuir dadus populasaun barak maka hela iha neeba, ida nee mos sai hanesan parte ida atu hari Tribunal iha neeba.
Tanba rekursu umanu ohin loron barak, tanba Timor oan barak maka remata ona sira nia estudu iha area direitu nian iha rai laran no mos rai liur, sentru formasaun bele prepara sira hodi ba tuir iha Tribunal sira nee.
Iha fatin ketak, Prezidente Tribunal Rekursu, Afonso Carmona dehan, orsamentu Tribunal nian neebe aprezenta ona aumenta ba iha kapital dezenvolvimentu, tanba atu hari Tribunal iha munisipiu.
“Osan ba kapital dezenvolvimentu liga ho instala Supremu Tribunal Justisa, no mos instala Tribunal iha Munisipiu haat hanesan Baucau, Viqueue, Ermera no mos Baucau, “dehan nia.
Nia dehan, orsamentu neebe iha sei utiliza atu hadia Tribunal tuan hodi instala Supremu Tribunal Justisa, no mos prioridade uluk hari Tribunal haat nee, depois maka sei planu fali ba iha Munisipiu sira seluk.
Jornalista: Terezinha De Deus
Editora: Carme Ximenes
