DILI, STLTIMORLESTE.com – Primeiru Ministru (PM), Kay Rala Xanana Gusmão dehan, presiza halo investigasaun ba ema deskonhesidu neebe tiru rezidensia eis Prezidente Republika (PR), Francisco Guterres Lú Olo.
Xefe Governu dehan, tenke halo investigasaun ba kazu neebe akontese iha rezidensia Eis Prezidente Republika, Francisco Guterres Lú Olo, tanba problema mak kilat musan tiru ba lalehan tun fali kona uma ida.
“Ita mos sente katak, buat nee loos ka lae, bala ida nee kala bala espesial, mais bala espesial hanesan nee Ukrania mak hatene,” dehan PM, Kay Rala Xanana Gusmão ba jornalista sira iha Kuartel Jeral PNTL, Kaikoli, Segunda (13/01/2025).
Nia esplika, PNTL presiza investigasaun, tanba iha eis Prezidente Republika, Francisco Guterres Lú Olo nia uma seguransa iha, maibe ema deskonhesidu iha hodi tiru.
“Tiru ba leten mak tun fali mai kraik, la hatene loos, tanba nee ita presiza investigasaun,” hatete Xefe Governu.
Iha fatin hanesan, Komandante Jeral Polisia Nasional Timor Leste (PNTL), Komisariu Jeral Polisia Henrique da Costa informa, prosesu ba kazu ema deskonhesidu tiru rezidensia eis PR, Lú Olo nee laos kazu baibain, tanba nee PNTL presiza apoiu husi parseiru sira, para hodi bele halo teste ba kilat musa neebe ema uza tiru sae depois tun kona uma.
“PNTL iha ona komunikasaun ba parseriu sira husi Austrália nian, para bele ajuda ita halo teste ba kilat musan iha laboratoriu,” nia Iiforma.
Nia hatutan, iha tempu badak nia laran parseiru sira sei mai, hodi apoiu ba ekipa investigasaun sira halo prosesu teste ba bala musan.
“Maske agora ita aprezenta ona ba Ministeriu Publiku, maibe ita sei persiza halo klean liu tan,” nia afirma.
(jen)
