DILI, STLTIMORLESTE.com – Hakarak ka lakohi Timor Leste tenke adere ba ASEAN, tanba nee presiza kapasita setor privadu sira, atu sira bele kompete iha merkadu livre.
Kestaun nee hatoo husi Deputadu Bankada FRETILIN, Oscar Lima ba STL iha Parlamentu Nasional, Dili, Sesta (10/1/2025).
Nia dehan, Timor Leste hakarak ka lakohi tenke adere ba ASEAN, tanba politikamente sei adere ba ASEAN tinan 2025. Maibe Governu tenke kapasita setor privadu nasional nunee bele kompete, liu-liu obras sira neebe iha tenke prioridade ba setor privadu.
“Labele hanoin fo deit ba internasional, lá dedika atensaun ba setor privadu nasional nee hela naran deit. Ita koalia klaru katak setor privadu nasional seidauk iha kapasidade natoon atu kompete ho maluk internasional, maibe buat hotu fo deit ba Xina sira deit, nee susar”, dehan Deputadu Oscar Lima.
Nia dehan, governu nia hanoin atu fo deit ba kompanhia internasional, uniku ba interese ida nee susar, tanba tama ba ASEAN née opta ona merkadu livre.
Tanba nee kapasitasaun governu ba setor privadu tenke sai realidade, labele sai hanesan slogan deit, atu koalia sai materia iha kampanha née suasar.
Nunee mos Visi Ministru Asuntu Parlamentar (VIMAP), Adérito Hugo hatete, preokupasaun Governu preokupa duni ba TL atu adere ba ASEAN, tanba nee orientasaun husi Xefe Estadu mos mai hamutuk ho Governu atu haree ba tinan 2025, nee sei kompleta rekejitu sira neebe seidauk prienxe.
“TL nia vontade atu adere ba ASEAN, neebe sei iha segundu Simeira fim do ano 2025, mak ita iha lideransa Prezidente Malázia nian hatoo ona kompromete katak, sira iha espetativa ba TL, katak durante sira nia mandatu TL sei adere ba ASEAN”, katak Adérito.
(gui)
