DILI, STLTIMORLESTE.com – Governu liu husi Sekretariu Estadu Igualdade (SEI) esforsu makaas oinsa mak bele kriminaliza Lei Insestu.
Kestaun nee hatoo husi Sekretariu Estadu Igualdade, Elvina Sousa Carvalho liu husi nia intervensaun bainhira halo enkontru ho rede referal sira iha salaun Maria Goreti Kaikoli, Tersa (18/03/2025).
Nia hatete, presiza kriminaliza Insestu tanba nee laos mos kultura Timor Leste nia.
“Lei kontra Violensia Domestika sei haree mos kona-ba kriminalizasaun insestu neebe durante hakarak duni maibe iha insestu sei iha pro kontra tanba ema balu hanoin katak kuandu aman oan, inan oan avo tun mai nee krimi insestu, ida bin ho alin maun ho alin neebe mak adultu, hau hanoin ida nee sei iha diskusaun nia laran, maske sei iha pro kontra maibe ita nia pozisaun mak nee, ita hakarak kriminaliza tiha insestu atu aman oan bin alin tenke kriminaliza, tanba ida nee laos ita nia kultura,” katak SEI.
Sekretariu Estadu dehan, SEI hakarak kriminaliza insestu, tanba nee laos kultura no SEI mos lakohi ema uza fali Insestu ho asedu seksual nee sai fali hanesan objetu hodi lasu fali ema seluk.
“Kuandu koalia kona-ba insestu, Ministeriu Ensinu Superior iha ona inisiativa ida ke bele aplauza ba Ministeriu tanba ezijensia mos katak agora asediu seksual nee buras los, laos instituisaun publika sira maibe iha eskola, universitariu, tanba nee mak Ministeriu Ensinu Superior servisu hamutuk ho UN WOMEN ho SEI atu establese kampu seguru,” katak Elvina.
Iha fatin hanesan, Diretora FOKUPERS, Domingas Afonso Amaral hatoo agradese ba Sekretariu Estadu Igualidade neebe mak luta makaas kona-ba oinsa halo prevensaun sira hasoru feto no labarik feto, no lori mos preokupasaun hatoo ba iha Governu.
“Hau atu hatoo deit parabens ba exelensia Sekretaria Estadu nia esforsu tomak neebe hahu halo iha inisiu tinan 2025 ita haree katak exelensia koko halo ninia advokasia ba ema mak kaer ukun sira liu-liu sira neebe kaer desizaun, ita haree isu nomos advokasia sira preokupasaun sira neebe durante ita hasoru exelensia konsege lori ba too iha ema kaer ukun sira, liu-liu kona-ba oinsa ba iha Ministeriu Justisa, no Lei Violensia Domestika, kazu insestu neebe mak ita presiza toma konsiderasaun ba asepsaun buat sira hotu hau hanoin nee diak tebes liga mos asuntu seluk direitu feto ba rai no propriedade, ida nee mos konsege toka iha Ministeriu Justisa,” katak Diretora FOKUPERS.
Diretora dehan, bazeia ba peskiza balu neebe mak FOKUPERS halo feto sira nafatin sai vitima, maske enkuadramentu legal sira iha ona.
(eme)
