DILI, STLTIMORLESTE.com – Halo kontratu profesores ba iha programa produtivu nian, liu-liu eskola tekvo neebe presiza profesores ba programa refere.
Asuntu nee hatoo husi Diretor Nasional Ensinu Tekniku Vokasional, Fernando Mouzinho Gama ba STL Kinta nee (26/02/2026).
“Nee mak agora ita iha ona planu 2026 nee ita hakarak halo kontratu profesores iha programa produtivu, tanba foin daudaun bolsa kandidatu profesores nee ita haree liu ba iha programa Sosio kultural nian, nee duni programa produtivu nian nee ita sei halo bazeia ba eskola sira neebe mak iha, profesores laiha ita sei halo kontratu ho sira, tanba agora ita iha ona lei atu aprova final nian, neebe agora iha Gabinete Juridiku, bainhira Gabinete Juridiku halo ona apersiasaun lei aira,” nia esplika.
Iha fatin seluk, Diretor Eskola Sekundáriu Téknika Vokasional ba Indústria no Teknólojia (ESTV-IT) 28 de Novembru Bekora, Tomas Pinto hatete, profesores ba area produtu iha eskola Sekundáriu Téknika Vokasional ba Indústria no Teknólojia (ESTV-IT) 28 Novembru Bekora sei menus.
“Profesores ba produtivu mak menus ou area espesifiku mak menus, mais area sientifiku ho sosio kultura barak liu ona. Dala ruma sei muda profesores sientifiku no sosio kultura balun ba fatin neebe presiza ou eskola seluk neebe presiza,” nia dehan.
(jac)
