DILI, STLTIMORLESTE.com – Total profesores iha Edukasaun Munisipiu Dili hamutuk 276 neebe atu tama ba idade reforma, no ba oin presiza subtitui fali profesores.
Kestaun nee hatoo husi Cesarina Correia Guterres nuudar Superintendente Edukasaun Munisipiu Dili ba jornalista STL iha nia knaar fatin Vila Verde, Tersa nee (29/07/2025).
“Ita nian total profesores neebe mak atu reforma hamutuk 276. Husi total refere feto 160 no mane 116. Agora daudaun ita bele hatete katak, sufisiente maibe bainhira reforma sira nee mos sei bele presiza tan profesores atu nunee bele prienxe fila fali ba eskola sira. Nee duni ba oin ita presiza subtitui fali profesores, ba hirak neebe mak tama ona ba iha idade reforma ninia, atu nunee ita bele koloka fali ba iha eskola,” nia esplika.
Nia akresenta, klaru katak numeru profesores reforma neebe ohin temi ona, sira nee bainhira reforma ona nee tenke subtitui fali profesores iha sira nian fatin, liu-liu ba eskola neebe ninia profesores tama ba reforma ninia.
“Ita nian total eskola iha Dili laran hahu husi nivel Eskola Públiku too ih ESTV hamutuk 232, EPE 60 eskolas, EBF 80 eskolas, 46 eskolas, ESJ 36 eskolas, ESTV 10 eskolas, numeru eskola nee mak lokaliza iha ita nian Munisipiu Dili,” nia haktuir.
(jac)
