DILI, STLTIMORLESTE.com – Presiza tan Prokurador Internasional 1 hodi fo formasaun ba formados sira iha Sentru Formasaun Juridiku no Judisiariu (SFJJ).
Diretora Sentru Formasaun Juridiku no Judisiariu, Marcelina Tilman da Silva dehan, SFJJ presiza tan Prokurador Internasional 1, hodi fo formasaun ba formados sira.
“Ami presiza tan Prokurador internasional 1, maibe to agora seidauk konsege rekruta. Haruka tiha ona ofisiu no termo referensia ba iha Ministru Justisa Portugal, atu publika hodi hetan Prokurador ida mai Timor maibe seidauk,” dehan nia ba STL iha Kaikoli, Sesta (22/08/2025).
Nia hatutan, oras nee daudaun Portugal mos iha hela Ferias Judisiariu, ofisiu nee haruka kleur ona tenta nafatin.
Nia katak, kuandu haruka ofisiu ba iha neebe loke konkursu Prokurador sira aplika, no sentru Formasaun Juridiku iha akordu Koperasaun ho Ministeriu da Justisa Portugal nian, kuandu presiza Juiz, Prokurador liu husi temu referensia. Se ba Juiz karik Juiz nian, se Prokurador ba iha Prokurador nian liu husi Ministeriu da Justisa, Diresaun Politika da Justisa, haruka ba iha Diresaun Politika Ministeriu da Justisa Portugal, iha neeba sira enkamina ba iha Tribunal no iha Portugal nian Supremu Tribunal, depois sira fo sai avizu. Se Juiz ka Prokurador sira hakarak bele aplika, halo selesaun iha neeba depois maka haruka naran mai.
Oras nee dadaun iha Juiz nain rua husi Portugal, Defensor ida husi Brazil, Advogadu Internasional ida, konservadora notariu ida husi Portugal, maka halao hela servisu iha Sentru Formasaun.
Nia hatutan, prokurador mak seidauk iha, ho nunee mak sentru liu husi Ministru Justisa haruka termu referensia ba iha Portugal hodi halo rekrutamentu.
Iha fatin ketak, Akademiku UNTL Rafael de Jesus dehan, formasaun ba formador sira tenke formador mai husi rai liur, atu nunee formasaun sira nee tenke lao rigor.
“Aseita ho formador mai husi rai liur, atu nunee sira bele fo formasaun ho diak, atu formador sira neebe remata husi sentru formasaun bele iha kapasidade diak, “dehan nia.
Nia katak, bainhira formados sira remata iha sentru formasaun ho kapasidade neebe diak, bele lori setor justisa lao ba oin.
(ter)
