LAUTÉM, STLTIMORLESTE.com – Presu foos iha Suku Bauro folin la normal, situasaun nee halo komunidade sira sente insatisfas ho presu foos neebe iha.
“Ita haree presu foos iha teritoriu nasional ho folin balun karun no baratu, depende supermerkadu neebe faan, tanba durante nee presu foos iha Suku Bauro no aldeia sira folin la normal,” dehan Negosiante Adelio Lopes ba STL iha Bauro, Sesta nee (08/11/2024).
Tuir Negosiante nee, folin foos iha Suku Bauro no aldeia sira hanesan Somotcho, Sepelata, Ira-Lafai, Bauro, Luarai la normal, tanba foos ho marka Folsom 20kg saka presu US$ 20, no foos sira seluk, hanesan Amor de Familia, Tali merah, kg 20 ho presu US$ 19.
Tanba kompara folin foos iha tempu uluk, 20kg ho presu US$ 12.50, kompara ho situasaun ohin, presu foos iha merkadu, loja sira, liu-liu supermerkadu sira folin makas liu, entaun halo komunidade sira insatisfas ho presu foos karun.
Iha sorin seluk Komunidade nuudar konsumidor husi aldeia Luarai, Ernestina Cabral katak, presu foos iha Suku Bauro folin la normal, tanba saka 20 kg ho presu US$ 20, no foos sira seluk sae ba US$ 19, entaun nee halo komunidade sira mos difisil atu sosa foos.
Presu foos ho kondisaun la normal, nee hanesan preokupasaun boot liu ba nesesidade komunidade nian, laos iha Suku Bauro deit, maibe komunidade iha munisipiu liu-liu teritoriu nasional sira enfrenta hotu, no ezije presu foos folin sae.
Iha parte seluk, Xefi Suku Bauro, Florindo Miranda hatete, foos folin karun iha Suku Bauro, laos emprezariu sira mak inventa, maibe folin foos nee mai husi kompanhia rasik, tanba nee mak hanesan supermerkadu ka loja sira iha Suku Bauro faan tuir saida mak emprezariu sira faan.
(EST 1)
