DILI, STLTIMORLESTE.com – Prezidensia Republika liu husi Xefe Kaza Sivil nomos Asesora Empoderamentu Ekonomika Ba Feto, Jesuina Maria Ferreira Gomes, entrega sertifikadu ba feto benefisiaria Ema ho Defisiensia (EhD) nain 29.
Iha biban nee, Jesuina Maria Ferreira Gomes liu husi diskursu hatoo agradese ba Maromak, tanba ho nia grasa no domin mak ohin hamutuk iha Palasiu hodi entrega sertifikadu rekonhesimentu apresiasaun ba esforsu neebe halo liu husi treinamentu loron rua.
“Ohin Iram dehan ona konaba Prezidente nia vizaun no misaun, 2022 Prezidente mai iha Palasiu Prezidente iha vizaun no misaun saida mak atu halo iha mandatu tinan 5,” katak Xefe Kaza Sivil nee iha Palasiu Prezidensial Nicolau Lobato, Bairru Pite, Dili, Kinta (11/12/2025).
Prezidente kria unidade ida mak unidade Empoderamentu Ekonomia Feto iha mos unidade ida inkluzaun sosial.
“Prezidente hakarak promove direitu ema hotu hotu nia labele husik ema ida iha kotuk inklui feto, joven no ema sira neebe ho nesesidade espesial hanesan ita boot sira, Prezidente mos sempre dehan atu empodera ema laos liu husi formasaun no treinamentu hela deit maibe fasilita oinsa depois treinamentu nee ita boot sira bele komesa ona ita boot sira nia negosiu, tanba nee mak agradese ANZ reprezentante iha nee ho nia apoiu fo ona formasaun ba ita boot sira nain 25 konaba jestaun bisnis nia,” dehan nia.
Nunee mos Asesora Prinsipal EEF Prezidensia Republika, Iram SAEED hatutan, nee hanesan oportunidade diak ida atu hasoru malu iha nee.
“Hau reprezenta diskursu badak hodi hau-nia ekipa nia naran iha Unidade Empoderamentu Ekonomia ba Feto nian iha Gabinete Prezidente. Empoderamentu ekonomia ba feto emprezariu kiik sira-nian mak prioridade prinsipal ida husi Excelencia PR Jose Ramos Horta. Hahu kedas nia mandatu iha tinan 2022 nia hateten, ho klaru katak feto lokal sira neebe halo negosiu kiik tenke hetan apoiu,” dehan Asesora.
Nia fiar katak, rendimentu uma-kain nian husi empreza kiik sira rezulta fo kbiit ba feto sira neebe kontribui diretamente ba finansas familia nian, hadia edukasaun no saude ho hahan ba labarik sira neebe importante ba dezenvolvimentu ekonomiku ba tempu naruk.
“Ami iha Unidade Empoderamentu Ekonomia ba Feto organiza ona treinamentu jestaun negosiu ba feto emprezariu kiik sira no suporta sira hodi fo orientasaun, liga ho rekursu sira, fornese ekipamentu, instrumentu no finansas neebe presiza hodi hametin empreza kiik sira. Ami too ona feto emprezariais kiik liu total hamutuk 600 iha munisipiu 7 iha Timor-Leste hanesan Dili, Liquica, Manatuto, Aileu, Ermera, Bobonaro ho Oecusse,” dehan nia.
Maibe ohin loron, grupu feto emprezariu kiik sira ho defisiensia importante ba atu asegura katak, hotu hotu ba oin hamutuk no asesu ba rekursu sira fahe hanesan.
(eme)
