LIKISA, STLTIMORLESTE.com – Prezidensia Republika liu husi apoiu Sosiedade Sivil, oferese Parcel Natal ba povu liu-liu labarik Timoroan sira neebe hamahan aan iha Orfonatu sira neebe tau matan husi Madre sira iha Munisipiu Likisa, kompostu husi Orfonatu Dom. Gabriel Manek neebe tau matan husi Madre sira kongregasaun, Putri Ranha Rosario (PRS), Orfonatu Congregasaun Pequenas Apostolas de Redansaun (PRR) no Institutu Sekular Maun Alin iha Kristu (ISMAIK) iha Loes.
Tuir Xefe Departementu Inventarizasaun Presidensia Republika, Simeao Goncalves Correia, ba STL iha PRS Likisa, Sesta (07/11/2025) katak, atu Festeza loron Natal tinan 2025, Prezidente da Republika Jose Ramos Horta liu husi Apoiu Sosiedade Civil oferese parsela natal ba dahuluk ba povu iha Munisipiu Likisa, liu-liu labarik oan kiak sira neebe maka inan aman husik hela iha mundu nee, no tau matan husi madre sira iha orfonatu sira iha Timor Leste (TL).
“Ohin Ami lori Prezidente da Republika Jose Ramos Horta nia domin ba ksolok natal tinan 2025 nian, liu husi Ekipa Sosiedade Civil Mai fahe Parsela Natal ba Maluk Sira neebe hamahan Aan iha Orfonatu sira iha TL hahu husi Munisipiu Likisa, iha fatin 3 neebe maka oferese parsela natal hahu husi orfonatu Dom.Gabriel Manek neebe tau matan ba labarik sira husi Madre PRS hamutuk 34 pesoas kompostu husi feto nain 33 no mane nain 1, nunee Madre sira husi kongregasaun PRR neebe tau ba labarik sira hamutuk 60, nunee mos madre sira husi kongregasaun ISMAIK Loes neebe tau matan ba labarik orfonatu sira hamutuk 65 kompostu husi feto nain 35 no mane hamutuk 30,” dehan Xefe Departementu Inventarizasaun Presidensia Republika, Simeao Goncalves Correia.
Nia haktuir tan katak, apoiu parsela natal husi Prezidente Republika Jose Ramos Horta mak hanesan ai-haan nesesidade bazika, Foos, Mina tein, Manutolun ho ai-haan sira seluk tan inklui mos mantal ho farda atu labarik sira neebe hamahan aan iha orfonatu sira nee bele utiliza ba sira nia nesesidade loron-loron nian.
“Ami lori domin, laran luak husi Prezidente da Republika Jose Ramos Horta mai oferese parseira Natal tinan 2025 nian ba povu TL, liu-liu ba labarik orfonatu sira neebe maka hamahan aan iha orfonatu sira hodi hakman sira nia nesesidade hanesan aihan nomos ropa balun ba sira no apoiu nee sei haleu Timor laran tomak, hahu ohin husi Munisipiu Likisa, Bobonaro nomos munisipiu sira seluk tan,” dehan nia.
Iha oportunidade hanesan Madre Leonarda Pereira husi Kongregasaun Putri Ranha Rosario (PRS) neebe tau matan ba labarik sira neebe hamahan aan iha orfonatuu Dom. Gabriel Manek Likisa, agradese ba domin husi aman Estadu TL, Jose Ramos Horta liu husi Apooiu Sosiedade Sivil Presidensia Republika, neebe ohin entreha ona aihan ho ropa mai ami nia oan sira.
“Hau lori labarik sira neebe hamahan aan iha orfonatu Dom. Gabriel Manek Likisa, hatoo agradese no obrigado wain ba Prezidente da Republika, Jose Ramos Horta neebe maka ho laran luak ohin lori parsela natal mai ami no iha biban nee, ami husu ba PR atu bele hadia ami nia kareta neebe aat, hodi tula labarik sira ba eskola, tanba iha Likisa labarik sira ba eskola sempre hasoru problema transportasaun no foin lalais nee ami nia oan nain ida hetan soke husi kareta iha zebracros tanba lao ain,” dehan nia.
Iha fatin seluk Madre husi Congregasaun Pequenas Apostolas de Redansaun (PAR), Madre Mercy Thomas nudar Cordinadora PAR Timor Leste agradese ba domin husi Prezidente da Republika, Jose Ramos Horta neebe mak ohin oferese aihan no ropa iha ambitu Festa Natal tinan 2025.
“Ba domin tomak husi PR Horta, ami la iha buat ruma atu fo, ami so hasae deit orasaun atu PR hetan saude diak ho ekipa Sosiedade civil Presidensia Republika neebe maka ohin hakat mai iha ami nia fatin no entrega aihan no ropa,” dehan nia.
Nunee mos Irman Jacinta dos Santos husi kongregasaun ISMAIK Nuudar Responsavel orfonatu ISMAIK Loes mos agradese ba PR Horta neebe maka liu husi Sosiedade civil, ohin oferese aihan no ropa ba oan sira iha orfonatu ISMAIK.
“Ami agradese ba apoiu husi PR Horta, durante nee ami lahetan apoiu permanente husu fain selu, maibe ami fiar ba maromak, buat hotu sei lao dia. Ami mos hetan apoiu harii ami nia orfonatu nee husi BNCTL harii Uma ho Osan $65.000, tinan kotuk Htan ahusi MF, Santos, Apoiu Aihan husi Rise hunger husi Amerika maibe Agora laiha ona. Ramata iha Agostu 2025. Ami Nia Kongregasaun nee husi Dom.Bosco, vizita husi Maun Alin barak,” dehan nia.
Nia akresenta, Kongregasaun nee harii husi Dom. Bosco iha tinan 1998.
Jornalista: Joseph Koa
Editor: Joseph Koa
