DILI, STLTIMORLESTE.com – Xefe Kaza Sivil Prezidensia Republika, Maria Ferreira Gomes hatete, Prezidensia Republika simu tetu fiskal husi Governu US$ 8.125.030 no husu adisional hamutuk milhaun US$ 4.7, atu nunee bele asegura funsionamentu ba programa, sub-programa no atividade sira iha Prezidensia Republika.
Xefe Kaza Sivil dehan, proposta inisial neebe hatoo ba Ministrriu Finansas iha maiu hamutuk milhaun US$ 13. Ohin aprezenta tiha programa, sub-programa no atividade sira nee hodi prienxe tetu orsamental US$ 8.125.030 husu tan orsamentu adisional miliaun US$ 4.7.
Xefe Kaza Sivil dehan, Prezidensia Republika aprezenta iha Salaun auditoriu, Ministeriu Finansas, programa no proposta Orsamentu Jeral Estadu (OJE) 2026 ba Komite Revizaun Orsamentu (KRO) neebe lidera husi Primeiru Ministru, Kay Rala Xanana Gusmão.
“Proposta inisial neebe ami hatoo ba Ministeriu Finansas iha fulan-maiu hamutuk miliaun US$ 13. Ohin aprezenta tiha programa, sub-programa no atividade sira nee hodi prienxe tetu orsamental US$ 8.125.030 no ami mos husu tan orsamentu adisional miliaun US$ 4.7,” dehan Xefe Kasa Sivil nee, liu husi Komunikadu neebe STL asesu Sabadu ( 23/08/2025).
Nia hatete, proposta orsamental nee fahe ba salariu no Vensimentu US$ 3,822,664, Bens no Servisu Korrentes US$ 3,301,366 no Transferensia Publikas US$ 1,001,000. Enkuantu orsamentu adisional neebe propoin nee aloka ba kategoria haat mak hanesan Salariu no Vensimentu millaun US$ 1,2, Bens no Servisu millaun US$ 3, Kapital Menor US$ 320.000 no Transferrnsia Publika US$ 54.000.
Relativamente ezekusaun OJE 2025 too iha Jullu nia rohan, Prezidrnsia Republika ezekuta ona 62%. Rezultadu ezekusaun nee kompostu husi salariu no vensimentu 52%, Bens no Servisu 63%, kapital menor ho transferénsia publika 82%, kapital dezenvolvimentu 48%.
Ekipa husi Prezidensia Republika, neebe akompana Xefe Kaza Sivil mak Diretora Jeral Administrasaun, Sekretaria Ezekutiva Gabinete Prezidensia Repiblika, Inspetor GIFA, Diretór Finansas no ekipa, Diretor Rekursu Umanu, Koordenadora Casa Militar no Asesor Planeamentu.
(eme)
