DILI, STLTIMORLESTE.com – Prezidente Autoridade Rejiaun Administrativa Espesial Oekusi Ambeno (RAEOA), Rogério Tiago Lobato hakarak hasai komunidade Oekusi husi izolamentu, tanba nee informa ba Primeiru Ministru, Xanana Gusmão atu ateru estrada rural 90 kilometru.
Tuir Prezidente Autoridade RAEOA, Rogério Tiago Lobato katak, ohin nee enkontru normal ho PM Xanana, hodi relata situasan iha Oekusi, tanba nee mai informa ba PM Xanana Gusmão kona-ba servisu saida mak halo iha Oekusi.
“Agora ami halo esforsu makaas atu hasai komunidade Oekusi husi izolamentu, hanesan iha foho lá asesu ba estrada, tanba populasaun atu hetan diak, estrada mos tenke diak”, katak Prezidente Autoridade RAEOA, Rogério Tiago Lobato ba jornalista sira iha Palasiu Governu, Dili, Sesta (13/12/224).
Nia dehan, estrada iha foho sira, iha Oekusi tinan 20 ona laiha manutensaun, tanba nee mai informa ba PM atu halo estrada iha Oekusi.
Projetu nee emerjensia, tanba tenke hasai komunidade sira husi izolamentu, hanesan dalan Oekusi ba Pasabe, Pantai Makassar ba Nitive la diak, estrada sira née tinan 20 ona, neebe liu husi projetu emerjensia sira ho osan neebe iha kiik, tanba osan boot atu halo definitiva laiha, maibe osan kiik hodi ateru, nunee hodi fasilita movimentu komunidade sira.
Nia deklara, ho projetu sira nee sei gasta orsamentu la liu milhaun US$ 5. Enkuantu iha projetu emerjensia ba estrada née hetan kolaborasaun diak husi komunidade sira, tanba sira durante nee hein hela estrada, tanba nee komunidade sira kooperasaun diak, sá tan empreza neebe kaer projetu nee Oekusi oan hotu, neebe benefisia ba komunidade benefisia mos ba empreza Oekusi.
Karik komunidade sira mak husu rekompensasaun ami prontu, neebe iha atu halo estrada, née bainhira kona sira nia plantasaun mos ami anota kedas, ami halo komunikasaun diak ho komunidade sira”, tenik nia.
Nia afirma, komunidade sira nee uma kain hira mak sei kona, maibe hein levantamentu hotu mak bele hatene.
Tuir nia, estrada rural sira neebe sei loke née pur volta 90 kilometru.
(gui)
