DILI, STLTIMORLESTE.com – Ho Mandatu foun Prezidente Konselhu Administrasaun ba Bee Timor Leste, Empreza Publika (BTL, E.P), Gustavo da Cruz hatete, eleitu ida nee laos oportunidade, maibe nee responsabilidade boot ba Timoroan tomak.
“Orgulhu ho konfiansa no politika tomak, bele hetan eleitu sai lider ba BTL, E.P, maibe ida nee laos sasukat ida husi oportunidade nian, maibe nee responsabilidade ba povu Timoroan hotu nian,” dehan Prezidente Konselhu Administrasaun ba BTL, E.P, Gustavo da Cruz liu husi nia diskursu iha salaun CNE, Dili, Tersa (29/10/2024).
Maski nunee nia dehan, situasaun hotu-hotu neebe akontese iha Sosiedade, la fasil liberta povu husi kiak no mukit iha sistema bee no saneamentu nia laran, maibe garante hodi servisu nafatin atu bele atinje objetivu ba sustentabilidade bee no saneamentu iha estadu Timor Leste.
Responsabilidade ida nee importante tebes, tuir onra politika IX Governu Konstitusinal nian, oinsa bele asumi responsabilidade nee loos, liu-liu oinsa bele organiza no dezenvolve ba setor bee no saneamentu iha Timor Leste.
“Ita haree iha sistema bee no saneamentu, buat balun ita halo ona, maibe buat balun mos seidauk kondisiona ba aspirasaun povu no nasaun nian, tanba husi dezafius sira neebe iha, fiar katak sei garante estabilidade ba bee no saneamentu sai efetivu ba povu tomak,” nia sublina.
Tanba tuir nia, progresu balu neebe governu anterior halo ona, maibe iha mos falhansu balun neebe presiza hadia, tanba nee husi mandatu refere, sura mos ho politika IX Governu Konstituisaun nian atu ajusta ba planu asaun hodi sistematiza bee no saneamentu sira neebe sai dignu ba sosiedade
Tanba husu ba publiku katak, BTL, E.P hamutuk ho MOP no SEAS hodi halo melhoramentu ba sistema Bee iha Timor Leste, nunee bele sai kondisaun asesivel ba ema hktu, tanba bee mak sai alvu prinsipal ba ema hotu nia vida moris loron-loron nian.
Entretantu Primeiru Ministru (PM), Kay Rala Xanana Gusmão dehan, asumi kargu ida nee, laos atu asumi konflitu ba interese, nunee tenke iha responsabilidade, onestidade ho servisu nasaun no povu Timor Leste
Tanba kargu ida nee nuudar responsabilidade, empreza publiku, laos sai fali emrezariu iha publiku nee la diak, tanba ne poder neebe ohin simu ona tenki asumi ho responsavel, servisu ho diak atu servisu ba povu no nasaun ida nee.
“Husu nafatin ba kargu xefia sira, simu oportunidade nee ho sai ema responsabilidade, oinsa bele dezenvolve ba nesesidade povu nian, no tenki hatudu ho onestidade diak ba Estadu Timor Leste, nunee hau bolu atensaun ba imi hotu, atu servisu hodi servi povu ho diak,” hatete Primeiru Ministru, Xanana.
(EST 1)
