DILI, STLTIMORLESTE.com – Prezidente Burundi Evariste N hakarak hametin kooperasaun bilateral ho Timor Leste (TL) iha futuru.
Lia kooperasaun nee hatoo husi Embaixador Zephyrin Maniratanga, reprezentante permanente Republika Burundi nian iha Nasoens Unidas ba jornalista sira bainhira remata hasoru malu ho Prezidente Republika, Jose Ramos Horta iha Palasiu Prezidensial, Nicolau Lobato Bairo Pite, Sesta (11/04/2025).
Bainhira hasoru malu, embaixador hatoo mensajen espesial ida husi Prezidente Burundi Evariste Ndayishimiye, neebe foka ba hametin relasaun bilateral sira entre nasaun rua nee.
Durante enkontru, Embaixador Maniratanga hatoo mensajen xave tolu husi Prezidente Ndayishimiye. Primeiru, Burundi hatudu apoiu makaas ba Prezidente Ramos Horta nia servisu neebe notavel iha grupu g7+ husi estadu sira nia laran.
Segundu, Prezidente Burundi sublina ninia hakarak atu hametin kooperasaun bilateral entre nasaun rua nee iha domíniu sosial no kultural sira, hodi destaka dezafiu sira neebe nasaun rua nee hasoru inklui mudansa klimatika, pobreza no kestaun global sira seluk.
Embaixador konklui hodi hatoo konvite ofisial ida husi Prezidente Ndayishimiye ba Prezidente Ramos Horta atu vizita Burundi.
“Hanesan onra boot ida ba hau atu hasoru malu ho Sua Exelénsia Prezidente Ramos Horta no hatoo mensajen importante ida nee husi hau nia Prezidente,” dehan Embaixador, Maniratanga.
Nia afirma, hafoin enkontru hodi sublina signifikadu husi kolaborasaun potensial entre nasaun rua ho esperiensia istoriku sira neebe hanesan.
(eme)
