DILI, STLTIMORLESTE.com – Prezidente Republika (PR), Jose Ramos Horta defende lideransa umanitaria etika iha Human Fraternity Majlis iha Abu Dhabi.
Prezidente Republika Jose Ramos Horta hamutuk ho lider mundial no ikon umanitariu sira nian durante Human Fraternity Majlis iha Abu Dhabi hodi diskute kona-ba “Humanitarian Response in Action Leading with Courage, Compassion & Integrity” ou ho Tetun: “Resposta Umanitaria iha Asaun Lidera ho Korajen, Kompaixaun no Integridade”.
Hamutuk mos ho Laureadu Nobel Kailash Satyarthi no Diretora-Jeral UNODC Ghada Waly, Prezidente esplora nesesidade urjente ba modelu lideransa sira neebe prioritiza etika no korajen moral hasoru krize global sira.
Tuir informasaun neebe STL asesu Kinta (05/02/2026) hatete, sesaun nee foku ba kria estratejia resposta lais no parseira multisetorial, hodi proteje komunidade sira neebe vulneravel ba dezastre natural no konflitu armadu sira, hodi enfatiza katak kompaixaun tenke sai forsa dudu ba ajuda internasional.
Durante dialogu nível aas nee, Prezidente Ramos Horta bazeia ba Timor Leste nia istoria klean kona-ba superasaun konflitu no haburas rekonsiliasaun nuudar modelu ba reziliensia global.
Xefe Estadu enfatiza katak esperiensia Timor nian fo lisaun importante sira ba komunidade internasional iha harii dame no responsabilidade umanitaria.
Liu husi partisipasaun iha forum prestijiozu nee, Xefe Estadu reafirma Timor Leste nia kompromisu neebe nanis ba dignidade universal no fraternidade umana, hodi pozisiona Timor Leste nuudar kontribuidor proativu ba buka resposta umanitaria neebe nakonu ho kompaixaun no efikas iha mundu tomak.
(eme)
