AMBENO, STLTIMORLESTE.com – Prezidente Konselhu Imprensa (KI), Otelio Ote ho parte Juridiku KI, realiza enkontru ho jornalista nasional neebe mak destakadu iha Rejiaun Administrativa Espesial Oekusi Ambeno (RAEOA) hamutuk ho Jestor Radio Komunidade Atoni Lifau ho nia jornalista sira inklui Midia Oficer sira neebe servisu iha Gabinete Prezidente Autoridade ho Sekretariu Rejional sira, rona sira nia preokupasaun no progresu servisu Midia nuudar kontrol sosial iha Timor Leste (TL).
“Ohin ami halao vizita ofisial ba jornalista sira iha Oekusi, parte ida husi ami nia mandatu, neebe ami tenke hatene kondisaun midia iha rejiaun sira, espesial liu ba iha Oekusi, atu hatene kona-ba jornalista sira nomos hatene kona-ba oinsa relasaun ho autoridade sira nian iha Oekusi nomos hatene kona-ba sidadaun sira nia entusiazmu atu simu midia sira iha TL.
Nia dehan, iha enkontru nee KI Elabora nia mandatu neebe besik remata ona, nunee mos liu husi enkontru nee atu hatene kondisaun midia iha Oekusi no utiliza oportunidade nee hodi realiza enkontru ho sira, atu rona sira nia preokupasaun no progresu servisu neebe sira halao iha Oekusi, nunee mos dezamina informasaun husi KI ba jornalista sira kona-ba kompetensia KI nian, karteira profisional ba jornalista sira, direitu resposta, retifikativu no futuru eleisaun ba mandatu KI foun nian.
“Ami agradese tanba enkontru ohin lao ho pozitivu tebes, jornalista sira iha Oekusi marka prezensa hodi ami koalia kona-ba KI nia kompetensia no mandatu, karteira profisional. Ami mos koalia direitu resposta no direitu retifikativu, koalia mos kona-ba prosesu eleisaun ba membru KI foun periodu tinan 2025-2029,” dehan Prezidente KI.
Iha enkontru nee, Prezidente KI husu ba jornalista sira atu hatuur lo-loos kompromisu ba divulgasaun informasaun kona-ba progresu servisu midia iha Oekusi Ambeno, tanba kada loron jornalista sira hatudu produtu jornalistiku iha plataforma midia idak-idak nian.
Liu husi enkontru nee, jornalista no Midia Oficer sira hatoo dezafiu neebe sira enfrenta durante nee no husu ba KI atu sensibiliza papel jornalista ba entidade sira nomos husu atu hasae kapasidade no konhesimentu jornalista sira nian liu husi formasaun, atu produtu jornalizmu neebe fornese ba publiku ho kualidade.
Responde ba preokupasaun jornalista sira nian, Prezidente KI dehan, KI iha responsabilidade atu eleva kapasidade teknika, profisional no intelektual husi midia sira iha fatin hotu-hotu, atu hametin komunikasaun ho instituisaun no autoridade relevante sira iha Oekusi, atu iha kondisaun ida neebe midia ho autoridade iha kooperasaun diak, hodi divulga informasaun ba publiku, tanba buat neebe mundu enfrenta mak informasaun sira neebe falsu no hamosu miss komunikasaun,” afirma KI.
Iha biban nee, Jestor Radio Komunidade Atoni Lifau, Jose Francisco Efi, hatoo benvindu ba Prezidente KI ho nia ekipa mai vizita jornalista sira neebe mak halao servisu iha Oekusi, hodi hatene dezafiu no progresu servisu neebe durante nee jornalista sira halao iha nee no prezensa Prezidente KI iha Oekusi bele fanun jornalista sira oinsa kontribui ba prosesu dezenvolvimentu liu husi produtu jornalistiku.
Agradese ba jornalista sira neebe mak destakadu iha Oekusi, tanba kolega jornalista sira neebe iha komitmentu neebe diak atu hatoo sira nia preokupasaun ba Prezidente Konselhu Imprensa kona-ba sira nia kestaun karteira profisional nomos hatoo kestaun balun neebe liga ho instituisaun sira iha Oekusi.
“Ita agradese tanba Prezidente KI mos halo anotasaun balun nomos hatoo rekomendasaun balun husi jornalista Oekusi ba iha nasional nomos sei mai koalia direitamente ho nai ulun sira iha Oekusi, liga ho produsaun jornalista sira nian iha Oekusi, tanba nai ulun balun iha Oekusi ladun kooperasaun diak ho jornalista sira kona-ba problema balun iha Oekusi,“ dehan nia.
Nia dehan, iha enkontru nee Prezidente KI mos hatoo informasaun kona-ba mandatu sira nian besik remata ona iha fulan Dezembru tinan nee, nunee ohin informa ba jornalista sira atu hili ninia reprezentante KI liu husi eleisaun husi jornalista sira nomos nain ba midia ho kriteria mak tenke iha ona kartaun profisional husi KI.
“Liu husi enkontru ohin, Prezidente KI enkoraja ba jornalista sira iha Oekusi atu kria embrio ida atu nunee ita bele hatoo ita nia difikuldade sira wainhira ita hasoru problema ruma iha nee, tanba atividades lubun boot neebe halao iha Oekusi la iha protokolu ida ba jornalista sira kona-ba servisu hirak neebe realiza iha Oekusi, maibe hanesan jornalista labele hein atu simu deit bola, maibe esforsu oinsa atu hasoru bola, tanba iha fulan Novembru tinan nee sei realiza eventu lubuk ida iha Oekusi,“ dehan nia.
Tuir observasaun STL iha enkontru nee, jornalista neebe marka prezensa husi RTTL. E.P, Egidio Nono ho Orlando Oqui, Ajensia Tatoli, I.P, Abilio Elo Nini, STL Corp, Yoseph Koa, Timor Pos Ermelinda Caet, RCAL Jose Francisco Efi ho Jose Maria Feno husi Radio Komunidade Atoni Lifau no Ermelinda Colo Jefriano Leonardo Lasi husi midia One Timor inklui jornalista husi APBNews, nunee Midia oficer husi Prezidente Autoridade RAEOA, Jose Mala no Felisberto Eco, midia officer husi Sekretaria Rejional Agrikultura, João Caunan no Paulino Cono Falo husi Sekretaria Rejional asuntu Edukasaun no solidariedade Sosial.
(jos)
